Бэрдьигэстээххэ ыттар сатабылларын тургутар күрэс буолан ааста

Бу көрөөччүлэр иннилэригэр маҥнайгынан 7 саастаах Нарыйаана Прокопьева Бастер диэн ааттаах французкай бульдогын кытары таҕыстылар.

Нарыйаана Прокопьева, Французкай бульдог боруодалаах Бастер хаһаайката: «Бастер буоллаҕына эргийэр, куобахтыыр, куолас биэрэр, олорор уонна ытыс уунар. Эдьиийдэрбин уонна убайбын кытта үөрэппитим».

2017 сыллаахха төрөөбүт быйыл күһүн 7 сааһын туолар Альдо диэн ааттаах Лабрадор боруодалаах ытын Семен Данилов илдьэ кэлбит. Ыал ийэтэ Альдоны кыра эрдэҕинэ аҕыйах хамаандаҕа үөрэппитин билигин да умнубакка толорор эбит. Ыт олус холку, оҕомсох диэн хаһаайына кэпсээтэ

Семен Данилов, Лабрадор-ретривер боруодалаах Альдо хаһаайына: «Хаҥаластан төрүттээх лабрадор-ретривер диэн атыыр. Быйыл 7 сааһын туолуохтаах. Кыра эрдэҕинэ хамаандаларга үөрэпиппит. Бэҕэһээ кыратык хатылаан бараммыт бүгүн холонорго диэн кэлэн турабыт».

7 ыйдаах ниэмэс овчарканы Алдана Винокурова итии күнү аахсыбакка Дьокуускай куораттан 180 км нөҥүөлээн күрэскэ анаан-минээн кэлбиттэр, суолга иккитэ тохтоон сынньанан ылбыттар. Алдана ытын хайдах көрөрүн-истэрин биһигини кытары үллэһиннэ

Алдана Винокурова, Ньиэмэс овчарката боруодалаах Альба хаһаайката: «Итии буолан киниэхэ ыарахан соҕус. Кыһынын кини дьиэҕэ кыстыыр. Овчарка кэннин сүһүөҕэ мөлтөх соҕус, тоҥорумуон наада».

Күрэс түмүгүнэн Бастер, Альба уонна Альдо хаһаайыттарын кытары кыайыылаах тахсаннар. Уоннуу тыһыынча солкуобайга тигистилэр. Оттон Алисия Алексеева Мика диэн пудель боруодалаах ытын кытыннаран маҕаһыын сертификатын тутта.

Бу курдук сэргэх бастакы тэрээһини көрбүт-истибит олохтоох дьон, мантан холобур ылан бэйэ кыылыгар эппиэтинэстээхтик сыһыаннастылар, уулуссаларбытыгар дьэллик ыттар ахсааннара да  кэнэҕэс өттүгэр баҕар аччыа этэ.