Аан дойдутааҕы "Мамонтёнок" бэстибээл Саха циркэтигэр саҕаланна

Хорсун трюк. Кытай акробата Шисюн Лань синньигэс быаҕа араас кутталлаах албастары оҥорор. Эбиитин өссө страховката суох. Аан дойдуга бастыҥ циркэ иитиллээччилэрин бэлэмнээн таһаарар Кытай дойдута "Мамонтёнок" бэстибээлгэ бастыҥ акробаттары аҕалла. Уопсайа 4 сылга биирдэ ыытыллар Аан дойдутааҕы тэрээһиҥҥэ 50-чэ кыттааччы кэллэ. Беларусьтан, Казахстантан, Таджикистантан, Кытайтан, Вьетнамтан, Монголияттан уонна Арассыыйа хас да куоратыттан кэлбит циркачтарга Саха бриллиантовай циркэтэ утары бэлэх уунна.

Бурятия күүстээх хамаандата 12 акробаты аҕалла. Кинилэр икки нүөмэри бэлэмнээн кэллилэр. Бу нүөмэрдэр туһунан Бурятия циркэтин уус-уран салайааччыта Алдар Кынзыбеев кэпсээтэ.

Алдар Кынзыбеев, Бурятия өрөспүүбүлүкэтин циркэтин уус-уран салайааччыта: "Биһиги бөлөҕүнэн толорор  вольтиж нүөмэрбит сэдэх жанрга киирсэр. Арассыыйаҕа маннык туруоруулах олох аҕыйахтар. Бу жанры харыстыыр уонна сайыннарар сыалтан бэстибээлгэ көрдөрөбүт".

Быйыл Марфа уонна Сергей Расторгуевтар аатынан Саха судаарыстыбаннай циркэтэ үбүлүөйдээх 30 сылын бэлиэтиир. Ол чэрчитинэн көрөөччүлэргэ анаан Аан дойду бастыҥ артыыстарын биир уораҕайга түмтэ. Акробатика, перш, босхо боробулуоха, эквалибристика курдук ураты, сонун нүөмэрдэри аренаҕа көрдөрүөхтэрэ.

"Уруулуу Казахстан Алма-Аты куоратыттан эдэр гимнастка кэлэн Саха циркэтин түһүлгэтигэр нүөмэрин чочуйа сылдьар. Кини оҥорор ыарахан нүөмэрэ эквалибр диэн ааттанар", - диэн корреспондент Уйгулаана Николаева сөҕө-махтайа циркэттэн кэпсиир.

Маны таһынан бэстибээл чэрчитинэн "Циркэ индустриятыгар Аан дойдутааҕы сибээһи хаҥатыы" диэн улахан пуорум ыытыллар. Уонна буола турар Азия оҕолорун оонньууоларын уруйдуу от ыйын 4-с күнүгэр киэһэ 8 чаастан Талай күөлгэ цирковой кавалькаданы уонна кутталлаах циркэ перфомансын көрдөрүөхтэрэ. Саха сирин хамаандатыгар кимнээх киирбиттэрин туһунан сүрүн режиссер кэпсээтэ.

Мария Харлампьева-Попова, Саха циркэтин сүрүн режиссёра: "Биһиги циркэбититтэн түөрт кыттааччы баар. Юлия Протодъяконова салачааччылаах каучуктар. Мария Жиркова аттары кытта нүөмэрэ, Валерий Ягасов салайар канатынан хаамааччылар бөлөхтөрө уонна үрдүккэ үҥкүү".

7-с төгүлүн ыытыллар Мамонтенок бэстибээл саха култууратыгар улахан өҥөлөөҕүн уонна бары артыыстарга умнуллубат уопут буоларын туһунан Саха өрөспүүбүлүкэтигэр култуура уонна духуобунай сайдыы миниистирэ кэпсээтэ.

Афанасий Ноев, СӨ култуура миниистирэ: "Циркэ искусствотыгар талааннарын көрдөрөн күрэхтэһиэхтэрэ. Ордук үрдүккэ сылдьар акробаттар интэриэһинэй буолуохтара диэн сабаҕалыыбыт. “Мамонтенок” бэстибээлбитин омук сирдэрэ олус сөбүлүүллэр".

Бэстибээл кыайыылаахтарын гала-кэнсиэригэр Дьокуускай куорат олохтоохторун уонна ыалдьыттарын күүтэллэр. От ыйын 2-с күнүттэн 7-с күнүгэр диэри Саха циркэтин уораҕайыгар 4 сылга биирдэ буолар улахан тэрээһини мүччү тутумаҥ.