Спортивнай дэриэбинэҕэ дойдулар былаахтара күөрэйэр

Дьокуускай куоракка Беларусь, Бахрейн, Кытай уонна Монголия былаахтара үөрүүлээх быһыыга-майгыга өрө күөрэйдилэр. Ыалдьыттар  Спортивнай дэриэбинэҕэ олохсуйбут туоһулара ыйанна. Саха сиригэр үктэммит үөрүүлэрин ытыс дохсун тыаһынан көрдөрдүлэр.

Үгүс киһи Саха сиригэр, Арассыыйаҕа даҕаны маҥнайгытын кэллэ. Онон оонньуулар иннинэ кыттааччылар үөрүүлэрэ уонна долгуйуулара хас даҕаны бүк күүһүрэр. Бахрейн курдук ыраах дойдуттан кэлбит оҕолор саҥа сиргэ кэлбит маҥнайгы санааларын үллэһиннилэр:

«Мин Саха сиригэр маҥнайгыбын кэллим, тэрийээччилэр үрдүк таһымнаахтык көрүстүлэр, кыттааччылар олус эдбэхтэр эбит.

Билигин улахан долгуйуу суох эрээри күрэххэ бу киирээри туран долгуйарым буолуо, бары бэлэммит, кыайыыга эрэ дьулуһабыт».

Хамаандалар "Азия оҕолоро" норуоттар икки ардыларынааҕы 8-с оонньууларыгар бары ох курдук бэлэмнэнэн кэлбиттэр. Холобур, Монголия спорстменнара хас биирдии оонньуулары көтүппэккэ таптаан кытталлар. Хас оонньуулар ахсын ахсааннара элбиир, уопуттара үксүүр. Онон быйыл үгүс мэтээли түөстэригэр иилинэн барар сыаллаахтар. Монголияттан уопсайа 45 спортсмен быйылгы оонньууларга кыттыыны ылыаҕа.

Батбаатар Эрдэнэваанчиг, Монголия хамаандатын салайааччы: «Монголия хамаандата биир да оонньууну көтүппэт. Ахсыс төгүлүн кыттабыт.  45 спортсмен буолан кэллибит. Бары көрүҥҥэ кыттабыт».

Ыалдьыттар Саха сиригэр ыытыллар күрэх үрдүк таһымын бэлиэтээтилэр, тэрийээччилэргэ махталлара муҥура суох. Бүтүн аан дойду кэтиир тэрээһинигэр кыттыыны ылар олус долгутуулаах уонна эппиэтинэстээх диэн санааларын үллэһиннилэр.

Ксения Фишер, Азербайджан хамаандатын чилиэнэ: «Бэйэм кыраайбынан, дойдубунан киэн туттабын. Спорт араас тэрээһиннэрэ ыытыллаллар, онно үгүс дойдуттан элбэх оҕо кыттан спорду өрө туталлар, сайдыыга кыах арыллар».

Севинч Гасанова, Азербайджан хамаандатын чилиэнэ: «Олус долгутуулаах, дойду чиэһин көмүскүүр, модун дойду сорҕото буолар. Судьуйалар үрдүк таһымҥа сыаналыахтара, ким кыахтаах кыайыа диэн эрэнэбин».

Саха сиригэр хаһыс даҕаны төгүлүн кэлбит киһи ахсаана эмиэ үгүс. Биир дойдулаахтарыгар Дьокуускай куорат, «Азия оҕолорун» историятын сиһилии кэпсииллэр.

Батбаатар Эрдэнэваанчиг, Монголия хамаандатын салайааччы: «Мин бэйэм манна үөрэммитим. Онон төрөөбүт дойдум кэриэтэ. 12 сыл устата үөрэммитим. Онон оҕолорго куораты кэпсиибин, билиһиннэрэбин. Дьокуускай куорат сайдыыта “Азия оҕолоро” оонньууну кытта быһаччы ситимнээх».

Дойдулар былаахтара спортсменнар дэриэбинэлэрин үрдүнэн күөрэйэн турара кыттааччыларга үгүс эппиэтинэһи эбэр, кыайар-хотор баҕа санааларын кымньыылаан биэрэр.