Саха сиригэр түөкүннээһин сытыырхайда

Сыл са5аланыа5ыттан түөкүттэргэ албыннатыы 1548 түбэлтэтэ таҕыста. Уопсай хоромньу 465 мөлүйүөн солкуобайтан тахсаҕа тэҥнэһэр. Хомойуох иһин, бу көрдөрүү күн-түүн улаата турар.

Түөкүттэр саҥа таһым албыннааһыҥҥа көһөллөр. Телеграмм ханаалтан Ис дьыала министиэристибэтэ буруйу оҥороооччулары булара ыарахан дии санаан сүрүннээн ити былаһааккаҕа үлэлииллэр. Ол эрээри силиэстийэ салаата син биир суолларын сойуппакка түөкүттэри тутаталыыр. Саха сирин олохтоохторун социальнай ситимнэрин  алдьатан, чугас дьонноруттан суол саахалыгар түбэспитэ буолан, элбэх харчылаах эпэрээссийэҕэ мөлүйүөнүнэн харчы көрдүүллэр. Дьон ыксалга киирэн биэрэн, туох баарын барытын уган биэрэр.

Валентин Удинов, СӨ ИДьМ пресс-сулууспатын референэ: “Үөрэх кыһатын үлэһитэ түөкүттэр угаайыларыгар киирэн биэрбитэ. Кини 590 тыһыынча солкуобайын сүтэрдэ. Култуура министиэристибэтиттэн эрийэбит диэн харчытын уорбуттар. Сахабыт сирин олохтоохторугар, ыалдьыттарыгар сэрэтиэ этибит, билбэт нүөмэргититтэн эрийдэхтэринэ кэпсэтибэҥ эбэтэр баан үлэһитэбит, ис дьыала уорганын үлэһитэбин, суотабай оператор исписэлииһэбин диэн эрийдэхтэринэ кэпсэтиини тохтотон, бэйэҕит туһааннаах сиргэ баран билсэргит ордук”.

Баан үлэһитинэн кубулунан куттала суох анал счетка харчыгытын көһөрөбүт диэн тиһиги элбэх түөкүн туһанар. Сэрэтии үлэтэ хас күн аайы ыытылларын үрдүнэн, дьон киирэн биэрэрэ аччаабат. Куорат олохтоохторуттан хайдах киирэн биэрбэт буолары ыйыттыбыт.

«Хамнаспын түөкүттэргэ уордара сылдьыбытым. Иккитэ төхтүрүйэн 12 тыһыынчабын устубуттара.

Мээнэ атын нүөмэр эрийэр буоллаҕына ылымыахха наада.

Барытыгар эппиэтинэстээхтик сыһыаннаһыф, болҕомтолоох буолуҥ диэм этэ

Билбэт нүөмэрбин тута араарабын».

Ый аайы хастыы эмэ сүүһүнэн мөлүйүөнү уораллар. Статистика көрдөрөрүнэн уопсай албыннаппыт нэһилиэнньэттэн элбэх бырыһыаны 60-тан аҕа саастаах дьон буолаллар, оттон иккис миэсэтэҕэ 18-тан 24 диэри ыччат дьон. Күн иккис аҥаарыгар ордук эрийэн кэлэллэр, үксүн киэһээ алтаттан. Бу көрдөрүү түөкүттэр тас дойдуттан харчы уоралларын туоһулуур. Киһи өйүгэр баппат элбэх харчыны ылан, билигин тас дойдуттан суолларын муннаран үлэлииллэр. Эрийэр төлөпүөннэрин нүөмэрин мүнүүтэ аайы уларытан араас ньыманы барытын туһаналлар. Өссө эбии ханнык ньымалары туһанан албынныылларын туһунан аҕа оперуполномоченнай кэпсээтэ.

Анастасия Тихонова, СӨ ИДьМ судургу дьыалаларга аҕа оперуполномоченнайа, полиция майора: “Госуслуги порталга хас биирдии киһи бэйэтэ туһунан кабинеттаах. Онно гражданин туһааннаах докумуоннара барыта баар. Түөкүттэр дьону алдьыннаах смс коду, пины билэллэр. Ол түмүгэр тус кабинеты алдьатан атын киһи аатыгар кредит ылаллар. Ол иһин араас сылтах булан эрийэр түөкүттэргэ эппиэттээбэт буолуҥ”.

Билбэт дьоҥҥутугар харчы көһөрүөххүт иннинэ, бааҥҥа баран исписэлиистэртэн туоһулаһаргыт наада.