Орто үөрэххэ сэттэ тыһыынча кэриҥэ бүддьүөт миэстэтэ көрүлүннэ

Орто анал үөрэхтэргэ докумуон сырсыытын сүпсүлгэнэ. Бэс ыйын 17 күнүттэн бары орто анал үөрэх кыһалара быйылгы абитуриеннарга ааннарын тэлэччи аһан үлэлэрин саҕалаатылар. Дьокуускайдааҕы тыа хаһаайыстыбатын техникумугар быйыл уопсайа 300 устудьуону ылыахтара 255 киин куоракка уонна 45 миэстэ Төҥүлүтээҕи филиалга көрүлүннэ.

Екатерина Попова, Дьокуускайдааҕы тыа хаһаайыстыбатын техникумун үөрэххэ туттарсыы хамыыһыйатын эппиэттиир сэкирэтээрэ: «Күнүскү үөрэххэ 9 идэҕэ докумуону тутабыт. 11 уонна 9 кылаас кэнниттэн оҕолору ылабыт. Бэтэрэнээр, землеустроитель идэтигэр 15 бүддьүөт миэстэтэ көрүлүннэ. Оттон сүрүн идэлэргэ 25 миэстэҕэ ылабыт».

Тыа хаһаайыстыбатын техникумугар "Профессионалитет" федеральнай бырагырааманан 12 хайысха эһиилги үөрэх дьылыгар үлэлиэҕэ. Үлэ идэтигэр үөрэтэргэ анаммыт материальнай-техническай бааза олохтоммут, уопсайдара 350 миэстэлээх. Билигин докумуоннары үксүн куйаар ситимин нөҥүө туталлар. Ол эрэн, уруккулуу илэ бэйэҕитинэн да кэлэн туттарыахха сөп.

Оттон Юрий Александрович Готовцев аатынан Дьокуускайдааҕы сервис технологическай техникумугар бэс ыйын 17 күнүттэн докумуону тутуу саҕаланан үлэ күөстүү оргуйар. Быйыл 9 идэҕэ 225 устудьуону ылыахтара, ол иһигэр икки саҥа хайысха арыллар.

Мария Павлова, Ю.А.Готовцев аатынан Дьокуускайдааҕы сервис технологическай техникумун дириэктэрин солбуйааччы: «Быйыл килиэп астааһынын хайысхатыгар саҥа идэ баар буолла. Манна 9 кылаас кэнниттэн ылабыт. Маны тэҥэ эмиэ 9 кылаас кэнниттэн “Торговое дело” диэн идэ баар буолла». 

Онтон айар-тутар хайысхаларга киириигэ аттестат орто баала эрэ буолбакка эбии тургутугу ааһан киирэллэр. Манна кинилэр талааннарын, сатабылларын көрдөрөллөр.

Мария Павлова, Ю.А.Готовцев аатынан Дьокуускайдааҕы сервис технологическай техникумун дириэктэрин солбуйааччы: «Икки көрүҥүнэн эбии эксээмэннэр бааллар. Иистэнньэҥнэргэ уонна парикмахердарга тутургутуу баар буолар».

Уопсайа бүтүн өрөспүүбүлүкэ үрдүнэн 42 орто анал үөрэх кыһата баарыгар 6712 бүддьүөт миэстэтэ көрүлүннэ уонна 291 миэстэ профессиональнай үөрэххэ тыырылынна. 3704 миэстэҕэ 9 кылаас кэннэ киириэхтэрэ, онтон 11 кылаас кэннэ 2923 миэстэ көрүлүннэ.

Онон, аны күһүҥҥэ диэри оскуоланы саҥардыы бүтэрбит, үөрэххэ туттарсыан баҕалаах дьон сыалламмыт идэлэригэр киирэргэ дьулуһуохтара.