Киин куоракка сырыы хааччахтанар

Спортсменнар дэриэбинэлэригэр киириигэ кытаанах хонтуруол. Кэлбит массыына бастаан ааһарга көҥүлүн көрдөрөр. Докумуону сыныйан бэрэбиэркэлээһин булгуччулаах. Пропуск  дьиҥнээх дуу сымыйа дуу диэн анал приборунан кытта тыктаран көрөллөр. Барыта оннугар буоллаҕына салгыы иккис түһүмэх бэрэбиэркэҕэ ааһаллар. Манна көлө иһин, багааһын, оннооҕор мотуорун иһин сыныйаллар.

Массыынаҕа баар малы-салы сиһилии көрөллөр-истэллэр, туох да кутталлаах, бобуулаах суоҕун бигэргэтэллэр.  Оттон массыына аннын сиэркилэ нөҥүө эригийэ сылдьан көрөллөр. Бу барыта норуоттар икки ардыларынааҕы таһымнаах күрэххэ куттал суох буолуутун хааччыйар сыалтан.

Владимир Ощепков, СӨ ИДьМ суолга куттал суох буолуутун хааччыйар иниспиэксийэ сырдатар үлэҕэ салаатын аҕа иниспиэктэрэ: “Хааччах кэмигэр суоппардары бобуулаах эттиктэри илдьэ сылдьыыга бэрэбиэркэ чэрчитинэн иниспиэктэрдэр массыынаны барытын арыйан көрүөхтээхтэр”.

Уопсастыбаннай бэрээдэги көрүүгэ, суолга-иискэ куттал суох буолуутун хааччыйыыга, саамай сүрүнэ, оонньуу кыттыылаахтарыгар нус-хас усулуобуйаны олохтуур сыалтан бары быраабы көмүскүүр уорганнар күүһүрдүллүбүт режимҥэ үлэлэрэ саҕаланна.

Валентин Удинов, СӨ ИДьМ пресс-сулууспатын референэ: "Полиция үлэһиттэрэ анал оборуудабанньанан, тиэхиньикэнэн хааччыллан олороллор. Билигин туох баар эбийиэктэргэ полиция үлэһиттэрэ дьуһуурустубалыахтара. Уулуссаларга патруллар элбиэхтэрэ.  Оонньуу кыттыылаахтарыгар барыта этэҥҥэ ааһарын хааччыйыахтара". 

Оонньуулар бүтүөхтэригэр диэри Спортсменнар дэриэбинэлэригэр икки кэрчик суолу саптылар. Ойуунускай аатынан уулуссаҕа массыына сырыыта тохтоото. Итини сэргэ Каландаришвили кэрчигэ эмиэ сабылынна. Бу суолларынан сылдьар оптуобустар быстах кэмҥэ уларыйбыт туһаайыынан дьону таһыахтара. Хас биирдии дьиэҕэ тумнуу суоллары оҥордулар, арай икки эрэ дьиэ ойдон хаалла. Бу дьиэ олохтоохторугар испиэһэгинэн пропуск оҥоһулунна. Онтон аһыллыы уонна сабыллыы тэрээһинин күн  үс кэрчик сири сабыахтара.

Василий Амросов, Дьокуускай куорат транспорын уонна суол хаһаайыстыбатыгар салалтатын салайааччы: “Онно күнү быһа сабыллан тураллар. Лермонтов аатынан уулусса Петровскайтан Короленкаҕа диэри. Маны сэргэ Октябрьскай Лермонтовтан Горькай аатынан уулуссаҕа диэри. Киров суолун кэрчигэ эмиэ сабыллыа. Аһыллыыга кэлбит дьоҥҥо табыгастаах буоллун диэн эбии массыына тохтуур сирин көрдүбүт. Лермонтов уулусса уҥа балаһатыгар көлөлөрү тохтотуохпут”.

Оттон бөөлүүн Короленконы саптылар. "Кыайыы 50 сыла" спорт дыбарыаһыгар күрэхтэһиилэр түмүктэниэхтэригэр диэри. Маны сэргэ аһыллыы күнүгэр оонньуу уотун эстафетатыгар Кыайыы болуоссатыттан Доҕордоһуу болуоссатыгар диэри суол быстах кэмҥэ сабыллыаҕа.