Дьокуускайга саҥа түөлбэлэри тутуу салҕанар

Аныгы олох усулуобуйатын ирдэбилигэр толору эппиэттиир "Звезднай" дьоҕус түөлбэ тутуутун үлэтэ күөстүү оргуйар. Бу түөлбэҕэ уопсайа 7 олорор дьиэ олоххо киириэхтээх, билиҥҥи туругунан иккитэ номнуо киирэн турар. Саҥа оскуола уонна уһуйаан аны эһиилги үөрэх дьылыгар дьоҕус түөлбэ олохтоохторугар ааннарын тэлэччи арыйыахтара.

Виктор Романов, СӨ тутуу миниистирэ: «Этэҥҥэ буоллаҕына эһиил саҥа оскуолаҕа үлэҕэ киириэхтээх. Ону тэҥэ 315 миэстэлээх оҕо уһуйаана тутулла турар. Эмиэ эһиил үлэҕэ киириэхтээх. Бу С сектор дьиэлэрин аттыгар турар. Онон оҕолору сатыы таһарга табыгастаах буолуо». 

Маны таһынан биир смена иһигэр 600 киһини көрөр кыахтаах поликлиника, докумуоннара быһаарылыннаҕына эмиэ тутуу үлэтигэр түһүнүөҕэ. Оттон хочуолунайга билигин тиһэх үлэлэр бара тураллар. Тустаах оборуудабанньа барыта кэлэн оннун булла. Бу барыта уокка холбонноҕуна аны күһүн  "Звезднай" дьоҕус түөлбэни сылааһынан хааччыйыаҕа. 

“Саҥа түөлбэ хочуолунайыгар кэлэн турабын. Тустаах оборуудабанньа миэстэтигэр кэлэн турар. Балаҕан ыйыгар 112 кВт күүстээх хочуолунай үлэлээтэҕинэ “Звезднай” түөлбэни бүтүннүү сылааһынан хааччыйыаҕа”, диэн корреспондент Алексей Решетников хочуолунайтан иһитиннэрэр.

Биэс сыл иһигэр Саха сиригэр хаарбах, аварийнай дьиэлэртэн дьону көһөрүү бырагырааматын чэрчитинэн 40 тыһыынчаттан тахса киһи саҥа дьиэлэргэ көстө. Көһөрүү үлэтэ билигин даҕаны бара турар. Саҥа «Звезднайга» көһөөрү дьон-сэргэ докумуоннарын дьаныардаахтык туттарар. Ол эрэн саҥа түөлбэҕэ көһөртөн аккаастанар киһи эмиэ ахсаана үгүс. Онон 17-с түөлбэҕэ Спортивнай тутуутун үлэтэ хойутаан эрэр.

Семён Потапов, дьиэ тутар тэрилтэ көһөрүү салаатын салайааччыта: «Ыраах диэн көһөртөн аккаастанар дьон баар. Дьиэ хаарбах туруктааҕын билинии саҕана атын дьиэлээх дьон суудунан быһаарсыах курдуктар. Аан бастаан сөбүлэҥ ыытабыт, маны баттаабатаххытына үлэ салгыы суутунан барыа диэн. Билиҥҥи туругунан сэттэ дьыала суукка баран турар. Ол иннинэ 12 этэ. Онтон биэс дьыалатыгар биир тылга киирэн, сөбүлэҥ таттаспыппыт». 

Саҥа тутуллуохтаах «Спортивнай» дьоҕус түөлбэ тутуутун үлэтэ туруоруллубут былаантан хойутаан иһэр.  Холобур, успуорт уораҕайын икки дьиэ көтүрүллэ илигиттэн сылтаан кыайан тутуу үлэтигэр киллэрбэккэ сылдьаллар. Ол да буоллар үлэ тэтимин түргэтитэн улаханнык хойутаабакка кэмигэр эбийиэк туттарыллыаҕа диэн Бырабыыталыстыба бэрэссэдээтэлэ Кирилл Бычков сэһэргээтэ.

Кирилл Бычков, СӨ бырабыыталыстыбатын бэрэссэдээтэлэ: «Баараҕай уустук бырайыак. Тутуу хаамыыта хас да ыйынан сыҕарыйан биэрбитин олохтоохтор өйдүөхтэрэ диэн эрэнэбит. Тутуу кэмигэр тэтими күүһүртэхпитинэ өрөспүүбүлүкэ баһылыга эппит болдьоҕор баттаһыахпыт дии саныыбын». 

Сотору кэминэн саҥа түөлбэлэр толору олоххо киирдэхтэринэ киин куоракка хаарбах туруктаах дьиэҕэ олорор киһи ахсаана лаппа аччыаҕа, куорат биллэ тупсуоҕа.