Хотугулуу-Илиҥҥи федеральнай университекка үөрэххэ туттарсыы саҕаланна

Саха сирин саамай сүрүн үөрэҕин кыһата - Хотугулуу-Илиҥҥи федеральнай университет быйыл саҥа устудьуоннарыгар аанын тэлэччи аста. Университет киин тутар хамыыһыйата Кулаковскай уулуссатыгар баар сүрүн куорпуһун бастакы, иккис этээстэригэр дьиэлэннэ. Дарина Наумова тутар хамыыһыйа үлэһитэ. Кини кэлбит абитуриеннарга, биитэр төрөппүттэргэ наадалаах ыйытыыларыгар хоруйдуур, ыйан-кэрдэн, сүбэ-ама биэрэр.

Дарина Наумова, ХИФУ киин тутар хамыыһыйатын үлэһитэ: "Биһигиттэн туох ханна баарын ыйыталлар. Биһиги хас биирдии кэлбит киһиэхэ ханнык эксээмэн туттаралларын, ирдэнэр баалы сүбэлиибит".

Быйыл университет бюджет миэстэтигэр эмиэ ааспыт сыл курдук 4136 устудьуону ылар соруктаах, ону тэҥэ төлөбүрдээх миэстэлэргэ балтараа тыһыынча кэриҥэ миэстэ баар. Үөрэххэ туттарсааччылар сүүстэн тахса идэҕэ киириэхтэрин сөп. Маныаха орто уонна үрдүк үөрэххэ киирэр кыах баар. Хотугу норуоттар тылларын уонна култуураларын үөрэтэр институкка бакалавриат уонна специалитет өттүнэн 15 үөрэтэр бырагыраама баар. Быйыл 2 хайысхаҕа саҥа идэлэри арыйдылар.

Галина Фёдорова, тутар хамыыһыйа эппиэттээх сэкэрэтээрин солбуйааччы: "Быйыл биһиги икки саҥа хайысха арыйдыбыт. Саха тыла уонна иитэр үлэни тэрийии диэн идэлэр баар буоллулар. Маны сэргэ музыка учуутала уонна эбии үөрэхтээһин педагога диэн".

Докумуоннары абитуриеннар бэйэлэрэ, биитэр кинилэр бэрэстэбиитэллэрэ бэйэлэрэ кэлэн тутар хамыыһыйаҕа биэриэхтэрин сөп. Биитэр Госуслуги портал  "Поступление в вуз онлайн" диэн суперсервис нөҥүө, эбэтэр почтанан докумуоннары эмиэ туттарыахха сөп.  Быйыл чэпчэтиилээх усулуобуйанан туттарсыыга кэккэ уларыйыылар киирдилэр. Чуолаан тус сыаллаах миэстэҕэ киирээччилэр, Работа в России портал нөҥүө үлэ биэрээччигэ сайаапка түһэрэр буоллулар.

Пётр Кычкин, ХИФУ киин тутар хамыыһыйатын салайааччытын солбуйааччы: "Билиҥҥи ирдэбилинэн тутар хампаанньа кэмигэр дуогабар түһэрсибэттэр. Ол дуогабары билигин оҕо үөрэххэ киирбитин кэннэ биирдэ түһэрсиллэр".

Тус сыаллаах миэстэлэргэ 500-тэн тахса сайабылыанньа киирэн турар. Маны тэҥэ байыаннай дьайыы кыттыылаахтарын оҕолоругар үөрэххэ туттарсыы бэрээдэгэ эмиэ бигэргэммитэ, кинилэр туспа куонкуруһу ааһаллар. 

Анатолий Николаев, ХИФУ ректора: "Биир кэлим эксээмэни иккистээн туттарааччылар үөрэххэ туттарсыыларын чопчулуохтаахпыт".

Ким эрэ эрэ саҥа үөрэххэ туттарсар, онтон ким номнуо үөрэҕин бүтэрэн диплом ылар түбүгэр сылддьар. Нам улууһуттан сылдьар Намина Жиркова педагогическай институту кыһыл дипломунан бүтэрэн дойдутугар Намҥа оскуолаҕа үлэҕэ киирэн аны күһүн бастакы кылаас оҕолорун үөрэтэ ылыаҕа.

Намина Жиркова, педагогическай институт выпускнига: " Устудьуоннуур сылларбар уопсайга олордум, активистаатым. Үөрэммит институппар, университекка, преподавателларбар  улахан махтал".

Хотугулуу-Илиҥҥи федеральнай университеты быйыл 400-тэн тахса устудьуон кыһыл дипломунан бүтэрдэ. Кинилэргэ дипломнарын үөрүүлээх быһыыга-майгыга туттардылар. Бэлиэтээн эттэххэ, университет быйыл төрүттэммитэ 90 сыллаах үбүлүөйдээх сыла.