VIII “Азия оҕолоро” оонньуулар волонтердара киин куоракка муһуннулар

Ыраах айантан кэлбит волонтердар Дьокуускайга олус үчүгэйдик, үөрэн-көтөн көрүстүлэр диэн бигэргэттилэр. "Азия Оҕолоро" оонньууларга үгүс сүүмэри ааһан хапсыбыттарыттан үөрүүлэрэ үгүс.

Быйыл уопсайа 1900 волонтер кыттыыны ылыахтаах. Арассыыйа араас муннуктарыттан уонна атын дойдулартан даҕаны кэлэн тэрээһини киэргэтиэхтэрэ, тэрийээччилэргэ күүс-көмө буолуохтара.

Айыллаан Винокуров - "Азия оҕолоро" норуоттар икки ардыларынааҕы 8-сыс оонньуулар волонтёрдар састааптарын салайааччы: «Саха сириттэн эрэ буолбакка дойду эрэгийиэннэриттэн уонна тас дойдулартан волонтердар кэлэллэр. Атын сылларга үлэлээбит волонтердар эмиэ бааллар».

Игорь Оконешников эдьиийэ 2016 сыллаахха ыытыллыбыт Азия оҕолоро оонньууларга волонтёр быһыытынан үлэлии сылдьыбыт. Эдьиийигэр ымсыыран быйыл бэйэтэ холоно кэлбит. Волонтёр сүрүн хаачыстыбалара хайдах буолуохтаахтарын сиһилии кэпсээтэ.

Игорь Оконешников - "Азия Оҕолоро" норуоттар икки ардыларынааҕы 8-сыс оонньуулар волонтёра: «Мин бастакыбын кыттабын. Миэхэ уопут курдук. Волонтер наар көмөҕө кэлиэхтээх, бэһиэлэй, хайаан да нууччалыы уонна английскай тылы билиэхтээх».

Волонтёрдар үлэлэрин үрдүк таһымнаахтык оҥорор буоллахтарына тэрээһин таһыма эмиэ үрдүүрэ чахчы. Ол иһин үлэҕэ түһүнүөхтэрин иннинэ үгүс үөрэҕи ааһаллар. Аан маҥнай куйаар ситимин нөҥүө бэлэмнэнэр эбит буоллахтарына, бу күннэртэн саҕалаан киин куоракка бары мустан сирэй үөрэниигэ көстүлэр.

Тимур Егоров - "Азия Оҕолоро" норуоттар икки ардыларынааҕы 8-сыс оонньуулар волонтёрдар холбоһуктарын успуорт хайысхатыгар менеджер: «Хас биирдии волонтер ботуогунан мустан үөрэнэллэр. Уопсай иһитиннэриини кэпсииллэр. Мин санаабар билигин бары сүрдээҕин харахтарыга уоттаахтар, сэниэлээхтэр, эдэрдэр. Бары бэлэмнэр, ол иһин бу оонньуулар үчүгэйдик ааһыахтара».

Волонтёрдары салгыы хас даҕаны ыйдаах бэлэмнэммит сыралатын түстүүр үлэ күүтэр. Өрөгөйдөөх тэрээһиҥҥэ туох баар күүстэрин-уохтарын ууран туран "Азия Оҕолоро" оонньуулар эйгэтин тэрийэр сыаллаахтар.