Дойду Президенэ Владимир Путин Дьокуускайга үлэлээтэ

Дойду Президенэ Владимир Путин Саха сиригэр сырыытын "Үлэ кыбаарталыттан" саҕалаата. Манна кини Өрөспүүбүлүкэ инновационнай хампаанньаларын бастыҥ бырайыактарын кытары билистэ. Бырабыыталыстыба бэрэссэдээтэлин солбуйааччы Анатолий Семенов ИТ уонна креативнай индустрия быыстапкатын билиһиннэрдэ.

Анатолий Семёнов - СӨ Бырабыыталыстыбатын бэрэссэдээтэлин солбуйааччы: «Через призму человеческого капитала мы показали, что развивать через капитал без образования невозможно. Именно это Владимиру Владимировичу понравилось. Он сказал, да, действительно надо такие проекты поддерживать».

Дойду баһылыгар Саха сирин киинэ индустриятыгар ситиһиилэрин билиһиннэрдилэр. Бу эйгэҕэ Арассыыйаҕа бэриллэр тас дойду наҕараадаларын 20% биһиги Өрөрспүүбүлүкэбит ыларын эттилэр. Маны сэргэ Владимир Путин ИИ медицинэҕэ туһаныыбытын сэргээтэ.

Игорь Саввин - "Сайберия" хампаанньа тэрийээччитэ: “Мы попросили предусмотреть организацию центра обработки данных для нужд лаборатории искусственного интеллекта республики».

Онтон Ил Дархан Айсен Николаев Өлүөнэни туоруур муоста Өрөспүүбүлүкэҕэ олус наадалааҕын бэлиэтээтэ. Онуоха дойду Президенэ Саха сиригэр сырыытын иннинэ бу боппуруоһу дойду үпкэ миниистирин Антон Силуановтыын ырытыспытын эттэ. Айсен Николаев муоста оҥоһулуннаҕына Өрөспүүбүлүкэ баалабай бородууктата 3% үрдүүрүн, оттон бүддьүөт 4.7 млрд ороскуота аччыырын иһитиннэрдэ. Маны сэргэ Дьокуускай куорат маастар былаанын дакылааттаата. Онно анаан айар уонна үөрэх хайысхаларыгар аныгы инфраструктура оҥоһуллара көрүллэр диэн эттэ.

Евгений Григорьев - Дьокуускай куорат баһылыга: «Дьокуускай куорат хаарбах дьиэттэн көһөрүү бырагырааматын түргэтэтээһин боппуруоһун туруордубут. Ону таһынан Өлүөнэ муостатын уонна Межвузовскай кампус тутуутун боппуруоһун дакылааттаатыбыт. Владимир Владимирович биһиги маастар быламмытын өйөөн, Дьокуускай куораппыт 2030 сылга дылы күүскэ сайдыахтаах.  Хаһан да сайдыбатаҕын сайдыахтаах. Инньэ гынан биһиги Президеммытыгар махталбыт муҥура суох».

Арассыыйа Дьоруойа Александр Колесов дойду Президеныгар  "Сулус" диэн Арассыыйаҕа соҕотох ытыы полигонун көрдөрдө. Билиҥҥи кэмҥэ снайпердар саҥалыы сэбилээһини ааһаллар диэн кэпсээтэ. Маны тэҥэ Владимир Путиҥҥа Уһук Илиҥҥэ оҥоһуллар пилота суох көтөр ааллары көрдөрдүлэр.

Александр Колесов - Россия Дьоруойа: «Кини уонча сыллааҕыта кэлэн барбыта уонна бу билигин кэлэн Өрөспүүбүлүкэбит сайдыытыгар күүстээх үлэлэр бара туралларын көрдө уонна дойду баһылыга буоларын быһыытынан күүстээх өйөбүлү оҥоруох буолла уонна инникитин да биһиги экономическай сайдыыбыт үрдүк таһымҥа тахсыа диэн бигэргэттэ».

Салгыы Владимир Путин каадыр бырагырааматыгар кыттааччылары кытары көрүстэ. "Земскэй дуоктар", "Земскэй учуутал", "Муравьев-Амурскай 2030" бырайыагынан үлэлиир исписэлиистэр дойду баһылыгын кытта кэпсэттилэр, санаа атастасытлар. Бу кэннэ Президент Муусука үрдүкү оскуолатыгар сырытта. Манна Саха сирин талааннаах оҕолорун кытары көрүстэ.

Оскуола тутуллуутун үбүлээһинин туруорустулар. Оҕолор саҥа оскуола аһыллыытыгар Владимир Путины ыҥырдылар уонна түмүккэ уопсай хаартыскаҕа түстүлэр.