"Боотур" байыастары үөрэтэр киин тэриллибитэ 2 сыла

Үс төгүл уруй тыла этиллэн, Ийэ дойдубут көмүскэлигэр турар уолаттарбытын эҕэрдэлиир-чиэстиир күн тосхойор. Бу күн "Боотур" этэрээт тэриллибитэ 2 сыла бэлиэтэнэр.

Анал байыаннай дьайыы саҕалыаныаҕыттан тутатына сүүһүнэн эр дьон бэйэлэрэ баҕа өттүнэн, дойдуларын көмүскүүргэ туруммуттара. Ол эрэн сорохторо армия кэккэтигэр сулууспалаабатах этилэр. Бэлэмэ суох байыастары таах хаалларбат туһугар – “Боотур” байыаннай үөрэтэр киини арыйбыттара

Саамай бастакы хомуллубут этэрээттэн бастакы байыастартан биирдэстэрэ "Таай" диэн позывнойдаах Боотур, чахчы биһиги кииммитигэр уолаттары чаҕылхайдык бэлэмнээн ыыталлар диэн тоһоҕолоон этэр. Кини Купянскай хайысхатынан сылдьыбыт киһи, манна үөрэтии тоҕоостооҕун онно сылдьан билбит.

"Таай" - "Боотур" 1 этэрээтин байыаһа: «Дойдуттан барытыттан мустубут саллааттары кытта тэҥэлээн көрдөххө таһымнаахтара биллэр этэ. Бастакы Боотурдар мобилизация иннинэ барбыппыт уонна саамай уустук сирдэргэ сылдьыбыппыт. Биһи кэннэ 15 этэрээт барда. Күүстээх бэлэми бараллар. Сырыы аайы таһымнара үрдээн иһэр».

Бу күн Боотурдары эҕэрдэлии үгүс киһи кэлбит. Бырабыытылыстыбаттан саҕалаан байыастар аймахтарыгар тиийэ. Бу күн этэрээт уолаттара ахтыспыычча көрсөн, кэпсэтиилэрэ тохтообот. "Турист" диэн позывнойдаах Михаил Копырин эмиэ туора турбакка, баҕа өттүнэн 3 этэрээттэргэ киирэн анал байыаннай дьайыыга туруммута. Үрдүк таһымнаах үөрэтиини ааспыт буолан, тутатына инники кирбиигэ киирбитэ.

Михаил Копырин - "БАРС-2" этэрээт разведка салаатын хамандыыра: «Үөрэтэр кииммитин 2 сылынан эҕэрдэлиибин. Махталбыт улахан, манна эрчиллибиппит, билбиппит көмөлөспүтэ».

Чахчы, Боотурадар сүрүн соруктара - байыастар олохторо, туруоруллубут сыалы-соругу ситиһии уонна дойдуларыгар төҥнөн кэлии буолар. Ол туоһута 367 байыас үрдүкү наҕараадаҕа тиксиитэ буолар.

Иван Черкашин - "Боотур" этэрээт хамандыыра: «Биһи этэрээппит иһиттэн, бу киин иһиттэн: Арассыыйа Дьоруойа уонна 50-тан тахса Эр санаа уордьана, ону тэҥэ 364 судаарыстыбынай наҕараадалаахтар. Уолаттар сэрии толоонугар хорсун-хоодуот быһыыларын көрдөрбүттэр».

Хас биирдии байыас манна туспа историялаах, бэйэтэ эрэ ааспыт суоллаах-иистээх, ол эрэн кинилэри биир күүс сомоҕолуур - төрөөбүт дойдуга таптал.