Бүлүү улууһугар бастакы зональнай инвестиционнай пуорум ыытылынна

Бэйэ дьыалатын Бүлүү улууһугар сайыннарар сыаллаах пуорумҥа 200-чэ тахса киһи кэлэн кыттыыны ылла. Саҥа саҕалаан эрэр дьон уопуттаах урбаанньыттартан сүбэлэттилэр. Биир күннээх тэрээһин киэҥ бырагырааматынан олохтоохтору уонна ыалдьыттары сөхтөрдө. 20 тахса Бүлүү улууһун олохтоохторо бэйэ оҥорон таһаарар бородууксуйатын быыстапкаҕа туруордулар. Балартан биирдэстэрэ Чинэкэ нэһилиэгин олохтооҕо Мария Орлосова мүөттээх ыҥырыыны иитиинэн 7-с сылын дьарыктанар. Быыстапкаҕа бэйэтэ оҥорор айылҕа мүөтүн, мыылатын уонна атын буортута суох бородууксуйаларын аҕалла.

Мария Орлосова, мүөттээх ыҥырыаны иитээччи: «7 тигээйи ыалыттан саҕалаан, билигин 45 баар. Туох баар бородуксуйатын барытын таһаарабыт. Улуустарынан таһан сылдьан атыылыыбын. Мыыла оҥооруутунан дьарыктанар буоллубут».

Куукула оҥорооччулар, тутуу матыраайылын оҥорооччулар уонна да атын интэриэһинэй хайысхаҕа үлэлии-хамсыы сылдьар дьон кэллилэр. 200-чэ киһи барыта Бүлүү улууһа сайдарын туһугар биир сыаллаах түмүстэ. Онус сылын быһах оҥоруутунан дьарыктанар Петр Саввинов Бүлүү улууһун биллиилээх ууһа. Кини бу пуорумҥа бастакытын кыттыыны ылар. Бу сытар быһаҕы кини 2 күнүнэн бүтэрэр, оттон 5-6 быһаҕы 3 күнүнэн. Куоратыгар маннык сонун тэрээһин ыытыллан үөрүүтэ үгүс уонна ханнык бырагыраамаларга кыттан дьыалатын саҕалаабытын туһунан кэпсээтэ.

Пётр Саввинов, тимир ууһа: «Соцхантараакка кыттыбытым. Онтон харчы ылан пневматическай өтүйэ ылбытым уонна онон охсуу үөстээх быһахтарын оҥоробун».

Инвестиционнай тэрээһин уопсайа 4 хайысханан ыытылынна: тыа хаһаайыстыбата, муниципальнай уонна чааһынай бас билии үлэлэһиилэрэ, туризм уонна блоггерство. Аан дойду таһымнаах, 10 тан тахса мөлүйүөн суруйтарааччылаах, Вячеслав Романов - Панда Саха, Бүлүү дьонугар-сэргэтигэр кэлэн үөртэ.

Эмтэнии салаатыгар Анастасия Николаева кытынна. Кини саас бочуоттаах сынньалаҥар тахсан массааһынан дьарыктаммыта 3-с сылыгар барда. Сылгы сиэлин хатан эмтээх массажердары оҥорор.

Анастасия Николаева, массажист: «Бэйэм эмтээх оттору хомуйарбын сөбүлүүбүн уонна доруобуйаны бөҕүргэтэргэ араас ньыманнан туттабын. Бу форумтан киһи элбэҕи билиэн сөп. Маннык ыытыллара наһаа туһалаах».

Бүлүү куорат төрүттэммитэ 390 сылын уонна Степан Аржаков төрөөбүтэ 125 сылын көрсө быйыл элбэх бэлиэ тэрээһин ыытыллара былааннарар. Бүлүү куоратын сайдыытын туһунан салайааччы Ян Попов иһитиннэрдэ.

Ян Попов, Бүлүү куорат салайааччыта: «Сайдыы хайаан даҕаны экономиканы кытта силбэһэн туруохтаах. Форум буолар сиригэр сайдыы барыахтаах. Кэлин куораппыт улууспут сайдыа диэн».

Оттон Бүлүү куорат үбүлүөйдээх тэрээһинэ балаҕан ыйыгар ыытыллара былааннанар.