Оҕо айымньытын дыбарыаһын төрүттээччи Фатия Авдеева төрөөбүтэ 100 сылын бэлиэтээтилэр

Бэс ыйын 14 күнүгэр Ленскэй улууһун Нүүйэ нэһилиэгиттэн төрүттээх Фатия Иннокентьевна Авдеева төрөөбүтэ 100 сыла. Кини олоҕун бүтүүннүү оҕо хамсааһынынын  тэрийиигэ, сайыннарыыга, оскуола таһынааҕы үлэҕэ уонна эбии үөрэхтээһини киллэриигэ анаабыта. Үбүлүөйдээҕи тэрээһиҥҥэ кини төрүттээбит Дьокуускайдааҕы оҕо айымньытын дьиэтин педаготара, иитиллээччилэрэ, үөрэҕирии салаатын үлэһиттэрэ, оскуола учууталлара кытыннылар. Наталья Мордовская Фатия Иннокентьевнаны кытта өр сылларга бииргэ үлэлээбитэ. Кини ирдэбиллээх, кыһамньылаах, дьону түмэр, оҕолору таптыыр, сүрдээх үлэһит этэ диэн кэпсиир.

Наталья Мордовская, эбии үөрэхтээһин педагога: «Татьяна Иннокентьевна сүрдээх ирдэбиллээх этэ. Бары киниттэн саллар этибит. Ол гынан баран туох да сүрдээх эйэлээх, наһаа үлэлээх кэлэктиипкэ үлэлээбитим”

Фатия Иннокентьевна  оҕо эбии үөрэхтээһинэ сайдыан, оҕолор талааннара арыллыан олус баҕарара, бииргэ үлэлээбит дьоно кини иннигэр сабыылаах аан диэн суоҕа диэн этэллэр. Барытын туруорсан олоххо киллэрэн иһэрэ. Бүгүҥҥү күҥҥэ оҕо айымньытын дыбарыаһа куорат биир бөдөҥ, баай историялаах, киэҥ хайысхалаах Оҕо кинин быһыытынан ситиһиилэхтик үлэлиир-хамныыр. Фатия Иннокентьевна олоххо киллэрбит тэтимин ыһыкытыбакка оҕо бары өттүнэн сайдыылаах буоларыгар дьулуһаллар. 

Екатерина Яковлева - оҕо айымньытын дыбарыаһын дириэктэрин солбуйааччы: «Биһиги эбии үөрэхтээһин 6 хайысхатынан үлэлиибит. Барыта баар биһиэхэ. Фатия Иннокентьнвна эппит баҕа санаатын барытын кэлэктиибинэн толорон иһэбит».

Бырааһынньытааҕы тэрээһиҥҥэ мустубут дьоҥҥо Фатия Авдеева туһунан документальнай кинэ сүрэхтэниитэ буолла. Киинэҕэ кини олоҕун-дьаһаҕын  ситиһиилээх үлэтин-хамнаһын түгэннэрэ, кини кытта бииргэ алтыспыт кэллиэгэлэрэ, иитииллэччилэрин ахтыылара киирдэ. 2020 сылаахтан дыбарыаска алын сүһүөх оскуолата аһыллан үлэлиир. Быйыл бастакы үөрэнээччилэр 4 кылааһы ситиһиилээхтик бүтэрэн куорат бастыҥ үөрэҕин кыһаларыгар тургутууну ааһан үөрэнэ киирдилэр. Билигин сайыҥҥы кэмҥэ дыбарыаска оҕолорго анаан икки лааҕыры үлэлэтэллэр. Фантазия лааҕыр бу күннэргэ сезона саҕаланан үлэ күөстүү оргуйар.

Диана Мохначевская, оҕо айымньытын дыбарыаһын "Фантазия" оҕо лааҕырын салайааччы: «Быйыл оҕолору чэбдигирдэр  бырагыраамабыт биһиэнэ комплекснай. Оҕолор сүрүннээн творческай хайысханнан барыахтара. Куорат киин болуоссатыгар кэнсиэр тэрийиэхпит». 

Оҕо айымньытын дыбарыаһа эбии үөрэхтээһин, алын сүһүөх оскуолатын үлэлэтэрин таһынан учууталларга, иитээччилэргэ анаан идэ таһымын үрдэтиигэ үөрэхтэри, куурустары ыыталлар. Салгыы даҕаны аныгы кэм хардыытынан, ирдэбилинэн оҕо бары өттүнэн сайдыылаах буоларыгар, төрүт үгэстэргэ олоҕуран саҥа бырайыактары олоххо киллэрэр соркутаахтар.