"Азия оҕолорун" оонньуулара арыллыытыгар кыттар дьон үлэлэрэ тэтимирэр

"Өрөгөй" спорт уораҕайыгар үлэ күөстүү оргуйар. “Азия оҕолорун” оонньууларыгар бэлэмнэнии чэрчитинэн күннэтэ үгүс үлэ үмүрүйэр. Дьиэ ис-тас бараана күннэтэ саҥардыллан, тутуллуоҕуттан ыла хапытаалынай өрөмүөнү көрбөтөх уораҕай тубустар-тупсан иһэр.

Михаил Пахомов, СӨ сүүмэрдэммит хамаандаларын бэлэмниир киин дириэктэрэ: «Өрөмүөн бөҕөтүн оҥордубут. Биһи нэһилиэнньэбитигэр үчгэй буоллун диэн. Бүтүн барытын уларыттыбыт».

Уопсайа "Өрөгөй" уораҕайыгар спорт 7 көрүҥэр киирсиэхтэрэ, сүрүннээн тустуу көрүҥнэрэ буолуохтара. Ону таһынан “Триумф” гостиницатыгар судьуйалары олордуохтара, аһынан хааччыйыахтара. Онно анаан гостиница 72 хоһун барытын өрөмүөннээн, остолобуойун саҥардан оҥорбуттар.

Таһырдьа таҕыстаххына Сайсары күөлүн кытылыгар саҥа спорт балаһаакката тутуллар. Таһырдьа эти-хааны чэбдигирдэр сири бэс ыйын 20 чыыһылатыгар диэри түмүктүөхтэрэ. Онтон Сайсары эбэ кытылын бүттүүнүн ахсынньыга диэри оҥоруохтара.

"Юность" стадионугар номнуо үҥкүү-битии, ырыа-тойук дьиэрэйбитэ ырааппыт. Айар бөлөх үлэтин манна ааспыт нэдиэлэттэн саҕалаабыт.

Норуоттар доҕордоһуулара, Арассыыйа оҕолоро, сомоҕолоһуу уонна да атын патриотическай тыыннаах дьүһүйүү тэрээһин үөрүүлээх арыллыытыгар туруоҕа. Биир сүрүн оруолу, эбэҥки норуотун кыыһын - Сэнгэрэни Самаана Портнягина толоруоҕа.

Самаана Портнягина, сүрүн оруолу толорооччу: «Сэнгэрэ уобараһа мин санаабар кини бэйэтин култууратын, норуотун олус сөбүлүүр».

Дьүһүйүүгэ уопсайа 15 үҥкүү туруоҕа, хас да ырыа ылланыаҕа. Онон айар бөлөх күннэтэ сарсыардаттан саҕалаан, киэһэҕэ диэри эрчиллии үгэнигэр сылдьллар.

Изабелла Егорова, режиссер, балетмейстер: «Биир ситимнээх, олус интириэһинэй. Саха сирин норуоттарын номохторун холбоон сүрдээх дьэрэкээн көстүү буолуохтаах».

Азия оҕолоругар анаан ыытыллар үлэлэртэн өрөмүөн өттө үгүһэ бэс ыйын 20 күнүгэр диэри түмүктэниэҕэ. Онтон тэрээһин үөрүүлээх арыллыытыгар кыттар дьон күннэтэ тэрээһин буолуор диэри үлэлиэхтэрэ, эрчиллиэхтэрэ.