"Саха сирин куукулаларын дойдута" быыстапка үлэээтэ

"Симэх" национальнай кииҥҥэ уопсайа 50 тахса уран тарбахтаах маастар 300 тахса үлэтэ көрдөрүүгэ турда.Чурапчы Төлөйүн олохтооҕо Изабелла Кузьмина 2015 сылтан куукула оҥоруутунан үлүһүйэр. Маастар оҥоһуктара өрөспүүбүлүкэ, Арассыыйа, бүтүн аан дойду даҕаны таһымнаах быыстапкаларга кыттыыны ылаллар. Билигин быыстапкаҕа "Таас хотун" диэн 2016 сыллаахха оҥорбут куукулатын дьоҥҥо-сэргэҕэ дьүүллэтэ аҕалла. Куукула туох матырыйааллартан оҥоһуллубутун маастар сиһилии кэпсээтэ.

Изабелла Кузьмина, куукула оҥорор маастар: "Төбөтүн матырыйаала полимернай туой диэн буолар. Онтон атына кумааҕыны сыһыаран оҥоһуллар. Киэргэтиитигэр бэдэр тириитин, хабах, оҕуруо, таас туһанным. Онтон баттаҕын коза түүтүттэн оҥордум".

Куукула оҥорор маастардар түмсүүлэрэ тэриллибитэ 10-с сылын үөрүүлээх быһыыга-майгыга бэлиэтээтилэр. Үбүлүөйдээх бэлиэ тэрээһиҥҥэ маастардар, куукула сүүрээнин сэҥээрээччилэр кэллилэр. Түмсүү үөскүөҕүттэн ыла араас хабааннаах быыстапкаларга кыттыыны ылар уонна быыстапкалары тэрийэр. Сыллата маастар ахсаана элбии турар диэн түмсүү чилиэннэрэ үөрэ саныыллар.

Айталина Иванова, куукула оҥорор маастардар түмсүүлэрин салайааччы: "Маннык олус үчүгэй дьарык баарын билэммит түмсүү тэриммиппит. Уон сыл устата 300 тахса киһи буоллубут".

Саха маастардара өрөспүүбүлүкэ эрэ иһинэн буолбакка бүтүн аан дойду үрдүнэн үгүс биһирэбили ылаллар. Номнуо норуот маастардара эмиэ бааллар. Онон куукула тигиитэ Саха сиригэр салгыы даҕаны өссө күүскэ сайдар туруктаах сүүрээн.

 Яна Игнатьева, "Симэх" национальнай киин дириэктэрэ: "Биһиги куулуны оҥорор маастардарбыт олус талааннаахтар, мындыр өйдөөхтөр уонна элбэх тиэмэҕэ үлэлииллэр. Фольклор да буоллун, остуоруйа да буоллун, олоҥхо да буоллун сюжеттаах куукулалары бу сылларга оҥорон таһаардылар".

10-с төгүлүн ыытыллар быыстапка балаҕан ыйыгар диэри үлэлиэҕэ. Оҕолуун-уруулуун дьоҥҥо-сэргэҕэ барыларыгар быыстапка аанын сарсыарда уонтан киэһэ алтаҕа диэри тэлэччи арыйар. Үгүс киһи кэлэн маастардар үлэлэрин дьүүллүөҕэ, сэҥээриэҕэ диэн тэрийээччилэр долгуйа күүтэллэр.

Айталина Иванова, куукула оҥорор маастардар түмсүүлэрин салайааччы: "Бу быыстапкаҕа, куукуланы, сыахайы өйдүүр, оҕо сааһын саныан баҕалаах  Дьокуускай куорат олохтоохторун, ыалдьыттарын барыларын ыҥырабыт".

Куукула оҥорор маастардар түмсүүлэрэ өссө даҕаны сайдан, таһымнарын ыһыктыбакка үлэлиир-хамсыыр сыаллаах.