Оҕо көмүскэлин күнүгэр төрөөбүт оҕолору дьиэлэригэр атаарыы буолла

Перинатальнай киин аактабай саалата дьонунан толору. Бүгүн үөрүүлээх күн. Арассыыйаҕа дьиэ кэргэн сылынан, Өрөспүүбүлүкэҕэ оҕо сыла уонна оҕо көмүскэлин күнүнэн чэрчитинэн бэс ыйын 1 күнүгэр төрөөбүт оҕолору уонна ийэлэри эҕэрдэлии үгүс дьон мустубут.

Васильевтар дьиэ кэргэҥҥэ бүгүн үөрүүлэх күн. Ийэ киһи Марина Васильева 5 оҕотун, кэтэһиилээх уолларын күн сирин көрдөртөрбүт. Бүгүн маннык улахан, үөрүүлээх тэрээһин буолбутуттан элбэх оҕолоох ийэ олус үөрбүт, долгуйбут.

Марина Васильева, элбэх оҕолоох ийэ: «Перинатальнай киин наһаа үчүгэй. Мин номнуо бэһиспин киирэн таҕыстым. Аргунова Лариса Петровнаҕа махтаныахпын баҕарабын».

Бу күн ийэлэри Дьокуускай куорат баһылыгын солбуйааччы Владимир Аржаков эҕэрдэлээтэ уонна куорат салалтатыттан бэлэхтэри уунна. "Арассыыйа ийэлэрэ" бүтүн Дойду таһымнаах уопсастыбыннай хамсааһын бэрэссэдээтэлэ Прасковья Борисова элэ-была тылы, кырачааннарга алгыс тылын этэн, ийэлэргэ бэлэхтэрин уунна. Маныаха бу күн тутатына төрөппүттэр ийэ хапытаалын докумуонун уонна элбэх оҕолоохтор дастабырыанньаларын туттулар. Бу күн биллэн туран, төрөппүттэргэ хаһан да умнуллубаттык өйдөрүгэр хаалыаҕа. Чуолаан оҕолорун ыла кэлбит аҕаларга. 

Стас Шестаков, эдэр аҕа: «Бастакы оҕобут буолар, долгутуулаах. Өссө кэлиэхпит. Дьоҥҥо этиэхпин баҕарабын, өссө да төрүү туруҥ».

Манна даҕатан эттэххэ, оҕо сылын чэрчитинэн саҥа төрөөбүт оҕолору тутатына ыарыыларын быһаарар скрининг бырайыага олохтоохтук үлэлиир. Бу сыл саҕаланыаҕыттан номнуо 4000-тан тахса оҕо бэрэбиэрэкэлэннэ. Бу хайысхаҕа үлэ салгыы барар.

Марианна Неустроева, неонатолог-быраас: «Бүгүн үөрүүлээх күҥҥэ 13 оҕону выпискалаатыбыт. 7 уол оҕо уонна 6 кыыс оҕо. Сыл саҕаланыытыттан 2300-тэн тахса оҕо төрөөтө».

Оттон оҕо көмүскэлин күнүгэр төрөөбүт оҕолор үчүгэй туруктаах дьиэлэригэр айаннаатылар.