Дьокуускайдааҕы научнай-чинчийэр институт хортуоппуй саҥа көрүҥүн таһаарда

Хаҥалас Нөмүгүтүгэр Дьокуускайдааҕы тыа хаһаайыстыбатын научнай-чинчийэр институт бааһынатыгар тыраахтыр тыаһа тохтообот. Институт быйыл уопсайа 23 гектар иэннээх сиргэ хортуоппуй ыһар былааннаах, билигин 10-тан тахса гектар номнуо ыһыллан турар. Владимир Яковлев бааһынаҕа үлэлээбитэ 20-тэн тахса сыл ааспыт. Сылын ахсын үлэбит тэтимэ түргэтиир уонна олордор сирбит кэҥиир диэн үөрүүтүн үллэһиннэ.

Владимир Яковлев, Дьокуускайдааҕы тыа хаһаайыстыбатын научнай-чинчийэр институт лабораана: «Быйыл олордуу үлэтэ үчүгэйдик баран иһэр. Күҥҥэ икки прицеп олордобут. Бу нэдиэлэҕэ бүтэриэхпит. Урут бу бааһына улахан аҥара эрэ баар этэ. Билигин өссө биир бааһыналаахпыт».

Үлэ түргэн тэтимнээхтик барарын туһугар лабарааннар күн өрөбүлэ суох сарсыарда 8-тан киэһээ 5-кэ диэри аһаҕас халлаан анныгар сылдьан үлэлииллэр-хамсыыллар. Төһө даҕаны сыралаах, сылатар үлэ буолбутун иһин сибиэһэй салгыҥҥа үлэлииллэрин туохтааҕар даҕаны ордороллор. Хата халлаан туруга үлэлииргэ табыгастаах гына туран биэрдэ диэн сэһэргээтилэр.

Граф Кириллин, Дьокуускайдааҕы тыа хаһаайыстыбатын научнай-чинчийэр институт лабораана: «Күммүт туран биэрдэ, бүтэрэн эрэбит. Ыһыы бара турар».

Институт районированнай, ол эбэтэр Саха сирин усулуобуйаларыгар үүннэрэргэ табыгастаах хортуоппуй көрүҥнэрин үүннэрэр уонна бэйэтэ саҥа суортары таһаарар. Холобур "Якутянка", "Вармас" уонна "Тулунскай" диэн өлгөм үүнүүлээх суортары институт таһааран сылын ахсын таптаан үүннэрэр.

Быйыл институт селекционердара "Эллэй" диэн суорду таһаараары боруобаҕа үүннэрэн көрдүлэр. Аны күһүн бу көрүҥ өлгөм үүнүүнү көрдөрдөҕүнэ кэлэр сылтан күүскэ олордор буолуохтара.

Наталья Константинова, Дьокуускайдааҕы тыа хаһаайыстыбатын научнай-чинчийэр институт үлэһитэ: «Эллэй суорт үүнүүтүнэн үчүгэй уонна ыарыыга ылларбат».

Саха сиригэр хортуоппуйу үөскэтии үлэтигэр Дьокуускайдааҕы тыа хаһаайыстыбатын научнай-чинчийэр институт улахан кылааты оҥорор. Биллэн турар үүнээйи ханна үөскүүр даҕаны ол сир климатыгар быдан үөрүйэх уонна үүнүүтэ өлгөм буолар. Онон хортуоппуй көрүҥнэрин Саха сиригэр үөскэтэр инникилээх суол.

Наталья Константинова, Дьокуускайдааҕы тыа хаһаайыстыбатын научнай-чинчийэр институт үлэһитэ: «Бэйэбит таһаарбыт суорпут биһиги сирбитигэр бассар».

Үгүс хаһаайыстыбалар, чааһынай даҕаны олордооччулар Саха сиригэр таһаарыллыбыт хортуоппуйу таптаан олордоллор. Онон институт сыллата биһиги усулуобуйаларбытыгар үүннэрэргэ табыгастаах саҥа көрүҥнэри таһаарарга дьулуһар.