Бэс ыйын 8 күнүгэр социальнай үлэһиттэр идэлээх бырааһынньыктара

Жанна Павловна үлэтин чааһа бородуукта ылааһыныттан саҕаланар. Маҕаһыын иһигэр киирэн испииһэгинэн көрөн сөптөөх аһы-үөлү талан корзинатын толорор. Сатаан бэйэлэрэ маҕаһыыҥҥа тахсан атыылаһар кыаҕа суох дьон эрдэтинэ испииһэк биэрэн социальнай үлэһит кэлэрин көһүтэллэр.

Жанна Мандарова, социальнай үлэһит: «Сүрүнүн үүт аһылыктары ылабыт уонна бурдук ас. Ырыынактан эт, арыы сакаастыыллар».

Толору суумка тутуурдаах бастакы киһитигэр тиэтэйэр. Киин куорат араас оройуоннарыгар олорор дьону кэрийэр. Көмөҕө наадыйар дьоҥҥо тиийэри сыыдам сырыыны тутуһар. Бастакы аадырыһа Авиагруппа оройуонугар олорор эр киһи.

Ааны аһан киирээт да кэлбитин биллэрэн дорооболоһон тута үлэтин саҕалаабытынан барар. Бородууктатын бэрийэн, отчуоттаан аны докумуон толорор, ону-маны туоһулаһар.

2022 сыллаахтан Жанна Павловна көрүүтүгэр-истиитигэр сылдьар Байанай Доҕордуунап 1-кы бөлөхтөөх инбэлиит. Хараҕын көрүүтэ кэһиллиилээх буолан дьиэ үлэтин кыайан толорор кыаҕа суох. Онон социальнай үлэһит нэдиэлэҕэ иккитэ кэлэн көмөлөһөр.

Байанай Доҕордуунап: «Үчүгэйдик үлэлиир, махтал эрэ киниэхэ».

Байанай төһө да инбэлиит буоллар чөл олоҕу тутуһар, спордунан дьарыктанар. Утуйар оронун таһыгар эрчиллэр тэрилэ өрүүтүн баар. Онон дьиэҕэ олорор киһи күннэтэ эрчиллэн күрэхтэһии арааһыгар кыттар.

Социальнай үлэһит төһө да ыарахан, сылаалаах үлэлээх буоллар бу эйгэҕэ үлэлиир киһи үгүс. Жанна Павловна этэринэн: "киһиэхэ көмөлөһөрдөөҕөр үчүгэй туох да суох".

Жанна Мандарова, социальнай үлэһит: «Киһи киһиэхэ үтүөнү, кэрэни баҕарар буоллаҕына бу үлэҕэ чэпчэкитик үлэлиэн сөп дии саныыбын».

Тустаах үлэни Өрөспүүбүлүкэтээҕи социальнай хааччыйыы кэлим киинэ сүрүннүр. Манна Дьокуускай куоракка 200-тэн тахса киһи күннэтэ үлэлиир. Маннык өҥөҕө аҥардас киин куоракка 800-тэн тахса киһи наадыйар.

Наталья Пахомова, Өрөспүүбүлүкэтээҕи социальнай хааччыйыы кэлим киинин дириэктэрэ: «Сыл аайы мөлүйүөнтэн тахса араас көрүҥнээх үлэни оҥоробут. Биһи социальнай үлэһиттэрбит дьиэҕэ-уокка соҕотоҕун олорор дьоҥҥо, кырдьаҕастарга көмө буолаллар. Биир тэтимнээхтик уонна дуогабар быһыытынан үлэлэһэбит».

Социальнай үлэһиттэр баар буоланнар кырдьаҕастар, инбэлииттэр тыын суолталаах көмөнү ылаллар. Бэс ыйын 8 күнүгэр бастыҥ социальнай үлэһиккэ Мария Дмитриевна Нартахова аатынан судаарыстыбыннай бириэмийэни туттарыахтара. Бириэмийэ хаһаайына субуота күн биллиэҕэ.