«Азия оҕолоро» оонньуулар ыытыллар эбийиэктэригэр үлэ түмүктэннэ

Пресс-турга 3 эбийиэгинэн сырыттыбыт. Роман Дмитриев аатынан олимпийскай эрэллэри бэлэмниир училищеҕа өрөмүөн үлэтэ 2016 сылтан ыытылла илик. 1990 сыллаах тутуу билигин саҥардыллан, сырдаан саҥа эбийиэктэн туох да уратыта суох буолбут. Былырыын тустуу саалатын, быйыл икки уопсайы уонна үөрэх куорпуһун өрөмүөннээтилэр. Маны таһынан чуолаан спортсменнар күрэхтэһии, дьарык кэннэ эттэрин-сииннэрин чөлүгэр түһэрэллэригэр анаан туспа чөлгө түһэр саала, остолобуой ордук тупсарылынна. Уонна туох баар мал-сал барыта саҥардыллан, Аан Дойду бастыҥ спортсменнарын түһэрэргэ, аһатарга бэлэмнээҕин көрдөрдө.

Семён Чердонов, Р. М. Дмитриев аатынан олимпийскай эрэллэри бэлэмниир училище дириэктэрэ: «Буолаары турар оонньууларга манна судьуйалар түһүөхтэрэ. Арааһынай дойдулартан, эрэгийиэннэртэн 144 судьуйалар түһэллэр, онно бэлэммит».

Училищеҕа дзюдо көрүҥэр бэлэмнэнэн саҕалаатылар. Саҥа саалаҕа Саха сирин сүүмэрдэммит хамаандата оонньуу иннинэ бүтэһик күүстээх хомуурун ыытар. Бастакы састаапка 17 оҕо, оттон иккис састаапка 8 оҕо кыттыаҕа.

Александр Моисеев, Р. М. Дмитриев аатынан олимпийскай эрэллэри бэлэмниир училище спорт салаатын салайааччыта: «Былырыыҥҥыттан толору дьарык саҕалаабыттара. Дойду араас куораттарынан сборданнылар ону таһынан Монголияҕа Улан Батор куоратыгар баран аастылар. Хамаанда бэлэм».

Оттон Баһылай Манчаары аатынан төрүт көрүҥнэр кииннэригэр, Модуҥҥа, 54 мөлүйүөн сууммаҕа саҥардыы үлэтэ ыытылынна. 14 мөлүйүөҥҥэ саҥа экран, колонка уонна да атын оборудование ылылынна. Оттон манеж иһэ аҥардас сырдаан кэҥээбит эрэ көрүҥнэммэккэ, саҥа дорожка тэлгэнэн үгүс спортсмены үөртэ. Уонна сиһилии туох үлэтэ ыытыллыбытын Модун дириэктэрэ кэпсээтэ.

Геннадий Васильев, Баһылай Манчаары аатынан "Модун" спорт төрүт көрүҥнэрин киинин дириэктэрэ: «Спортивнай күрэхтэһии саалларыгар уонна манежпытыгар өрөмүөн ыытылынна ».

Бары спортивнай эбийиэктэргэ тупсарыы үлэтэ баран, үгүс дьон спорка сыстан саҕалыыра саарбахтаммат. Азия оҕолорун оонньуутун кэннэ бары саалалар үлэлэрин урукку курдук саҕалаабытынан барыахтара.

Саҥа киин. Бу уокурук олохтоохторугар үөрүүлээх сонун. Саамай элбэх нэһилиэнньэлээх Сайсары олохтоохторо, Арассыыйа национальнай бырайыактарын чэрчитинэн тутуллубут, саҥа оҕо спортивнай оскуолаланнылар. Азия оҕолорун күрэҕиттэн манна кыргыттар волейболлара ыытыллыаҕа. Ол кэннэ бу оскуолаҕа уус-уран гимнастика, бокса, хабылыкка, пауэрлифтиҥҥа уонна да атын көрүҥнэргэ оҕолору дьарыктыыр буолуохтара.

Василий Рязанскай, 9-с №-дээх оҕо спортивнай оскуолатын дириэктэрэ: «Улахан сонун буоллаҕа Сайсары уокуругар. Саамай улахан нэһилиэнньэлээх уокурукпут уонна 5 оскуолалаахпыт. Сүрдээх элбэх оҕо кэлэн дьарыктанарын күүтэбит».

Доруобуйаларыгар хааччахтаах дьоҥҥо бу кииҥҥэ улахан болҕомто уурулунна. Онон, Сайсары саҥа спортивнай оскуолатыгар ким баҕарар кэлэн дьарыктаныан сөп буолуоҕа. Оттон билигин ис-тас өттүгэр хомунуу, ситэрии эрэ үлэтин ыыталлара хаалла.