Түргэн сырыылаах көлө улахан кутталы үөскэтэр

Сайын кэлэн, билигин ыччат куорат устун түргэнник сылдьар сырыыны талар. Суол быраабылатын барытын тутуһан сылдьар киһиэхэ, биллэн турар, табыгастаах көрүҥ буолар, оттон быраабыланы тутуспат киһи олоҕор улахан кутталы үөскэтэр. АГАТУ 2-с кууруһун устудьуона, Виталий Пудов, суолга сэрэхтээх буолууну кыра эрдэҕиттэн билэр. Сатыы сылдьааччыларга, чуолаан тротуарга киирэн биэриэн сөптөөх оҕолорго улахан болҕомтону хатыы сылдьыахха наада диэн кэпсээтэ.

Виталий Пудов, Дьокуускай куорат олохтооҕо: “Куорат ортотугар эрэ үчүгэй суол баар. Самокатынан сылдьар чэпчэки, түргэн”

Самокаттар Дьокуускай бары кэриэтэ оройуоннарынан тарҕанан тураллар. Ким баҕарар, сааһыттан тутулуга суох, төлөпүөнүгэр сыһыарыыны хачайдаан, төлөөн баран айанныан сөп. Дьиҥинэн булгуччу анал тротуарынан соҕотох айанныахтаахтарын, үгүс дьон иккиэ, оннооҕор үһүө буолан айанныыллар. Төһө түргэнник барарын бэрэбиэркэлээри биһиги эмиэ хатааһылаан көрдүбүт.

Суолу туоруулларыгар булгуччу бэлэсэпиэттэн, самокаттан түһэн баран, сатыы туоруохтаахтар. Оттон оҕолорун кэлээскэҕэ тиэйэн иһэр төрөппүттэр светофорга тохтоон турар кэмнэригэр кэлээскэлэрин туормаска туруоруохтаахтар, суолу туоруулларыгар бэйэлэриттэн уҥа өттүгэр тутуохтаахтар.

Дьокуускай куорат олохтоохторуттан транспорт саҥа көрүҥүн төһө биһирииллэрин ыйыталастыбыт.

Экраҥҥа былырыыҥҥы уонна быйылгы сыл биэс бастакы ыйдарын көрдөрүүтүн көрөҕүт. Өрөспүүбүлүкэ үрдүнэн сыл саҕаланыаҕыттан уопсайа 261 суол саахала бэлиэтэннэ. Өлбүт дьон ахсаана, хомойуох иһин, былырыыҥҥыттан икки бүк кэриҥэ элбээтэ, оттон эчэйии ылбыт дьон ахсаана быйыл 329.

Самокаттаах дьон суол саахалыгар түбэспит холобурдарын аҕа иниспиэктэр кэпсээтэ.

Владимир Ощепков, ИДьМ суолга куттал суох буолуутун хааччыйар иниспиэксийэтин сырдатар үлэҕэ салаатын аҕа иниспиэктэрэ: “Бу ыйга биир суол саахалыгар биир киһи улахан эчэйиилээх таххыбыта. Аҕалаах оҕо электросамокакка эккиэн айаннаан испиттэрэ. Суолу сатыы туораабакка айаннаан истэхтэринэ массыына түннэри көппүт. Оҕо улахан эчэйии ылбатах”

Төрөппүттэр болҕомтолоругар, оҕолоргутун көрүүтэ суох түргэн сырыылаах самокакка олордумаҥ. Бэлэсэпиэттээх дьон төбөнү, илиини-атаҕы харыстыыр анал экипировкалаах буоларгыт ирдэнэр.