Докуускай 8 уокуругар устудьуоннар этэрээттэрэ үлэлиэҕэ

Өр сыллар тухары муһуллубут бөҕү-саҕы уокурук үлэһиттэрэ устудьуоннар этэрээттэрин кытары хомуйаллар. Араас мастары, тимирдэри таһан биир киһи курдук өйдөһөн түргэн тэтимнээхтик үлэлииллэр. Бу иннинэ суолга хайыр таас быраҕан кэлбиттэр. Кинилэр уокурук салалтатыттан сайаапкалар киирдилэр даҕаны тутатына ылсаллар. Бүгүн үлэлээбиттэрэ маҥнайгы күннэрэ.

Михаил Андреев,Октябрьскай уокурук этэрээтин хамандыыра: «Маннык үлэлэр элбэх сирдэринэн бараллар. Сайаапкалар киирэ тураллар. Хас да сиргэ арахсан үлэлиибит. Уонна ыһыах саҕаланнаҕына күүстээх үлэлэр күүтүлэллэр».

Билиҥҥи туругунан киин куорат үрдүнэн уопсайа 136 устудьуон 8 уокуруктарынан этэрээттэргэ үллэстэн үлэлии-хамсыы сылдьар. Октябрьскай уокурукка 17 киһи ахсааннаах этэрээт үлэтин саҕалаата.

Оҕолор бэйэлэрэ бу курдук үлэлииллэрин туохтааҕар даҕаны ордороллор. Үтүө дьыала, үөлээннээхтэри кытта билсии-көрсүү уонна хамнас сайыҥҥы сынньалаҥ күннэрин киэргэтэллэр диэн сэһэргээтилэр.

Архип Кузьмин, устудьуон: «Харчы өлөрөөрү, дьоннору кытта билсээри уонна куораты ыраас оҥороору».

Светлана Окоёмова, этэрээт баһаатайа: «Бүтэһигин маннык бырайыак 2018 сыллаахха буолбута, ол иһин бу бырайыак чааһа буолбуппуттан үөрэбин. Оҕолор туһалаах сайыны атаарыахтара дии саныыбын».

Уокурук үлэһиттэрэ устудьуон оҕолор үлэҕэ кыттыһа кэлбиттэриттэн үөрүүлэрэ үгүс. Эбии күүс-көмө буолаллар, үлэлииргэ даҕаны сэргэх буолуоҕа диэн бэлиэтииллэр.

Анатолий Стручков, Октябрьскай уокурук үлэһитэ: «Стройотрядтар кэлэн көмөлөһө сылдьаллара махталлаах дьыала. Эдэр дьоннор кэлэн бары үчүгэй баҕайытык үлэлии сылдьаллар».

Стройотряд үлэтигэр сокуоннай саастарын туола илик оҕолор эмиэ кыттыыны ылар бырааптаахтар. Ол эрээри үлэ чааһа кинилэргэ кылгас буолар. Хас чаастан хаска диэри үлэлииллэрин сиһилии Терентий Третяков кэпсиир.

Терентий Третьяков, "Острог" бырайыак хамандыыра: «18 саастарын туолбут оҕолор сарсыарда 9 чаастан киэһээ 6 чааска диэри үлэлииллэр. 13:00 – 14:00 эбиэттииллэр. Онтон 18 саастарын туола иликтэр күн аҥарын үлэлииллэр».

Сайыҥҥы күннэри бэһиэлэйдик уонна саамай сүрүнэ туһалаахтык атаарыахтарын баҕалаах оҕолор Каландаришвили ууллусса 21 дьиэтигэр турар офиска уонна куйаар ситимиттэн биллэриилэри булан этэрээт үлэтигэр кыттыһыахтарын сөп.