Халаан урусхаллаах содулун туоратыы

"Хатырыкка билигин да сорох сиринэн уу түһэ илик. Онон хас да ыал арыыланан хаалбыттар. Дьиэлэригэр тыынан сылдьаллар", - диэн корреспондент Анастасия Добрянцева эмсэҕэлээччилэри кытта тыынан устан иһэн иһитиннэрэр.

Күөрэ-лаҥкы барбыт миэбэл, иһит-хомус, мал-сал. Сиик сыта киһи муннутугар тутатына биэрэр, дьиэҕэ киирдэххэ  киһи таҥаһа тута сиигирэн хаалар. Бу барыта ууга барбыт дьон дьиэтин иһэ. Киһи хараастар хартыыната Хатырык бары дьиэтигэр. Николай Слепцов дьиэтэ эмиэ улахан аҥаарынан баран, кэлэктиибин кытары халаан содулун туоратталлар.

Николай Слепцов, халаантан эмсэҕэлээччи: "Сарсыарда 7 чааска уу кэлбитэ уонна икки чаас иһигэр номнуо дьиэни ортотунан ылбыта. Тугу да кыайан быыһаабатахпыт, куотар аакка эрэ барбыппыт. Төрөөбүт еэһилиэкпин 5-6 чааһынан бүтүннүү ылла. Ким да тугу да кыайан куоттарбата, бэйэлэрэ нэһиилэ куотан биэрдилэр. Хата дьон эчэйиитэ суох ааста. Хомойуох иһин, сылгы, сүөһү былдьанна".

Николай Слепцов төһө да бэйэтин дьиэтэ ууга бардар, дьон иэдээниттэн туора турбакка кэлэктиибин кытары көмөлөһө сылдьар. Холбура, бу 5-ис дьиэлэригэр кэлэн төһө кыалларынан: уу оботторон, уу анныгар хаалбыт малы-салы таһырдьа таһааран, туһата суох буолбут миэбэли дьиэттэн таһаарарга үлэлииллэр. Билигин сүрүн үлэ - ууну оботторон дьиэҕэ сылаас биэрэр пуушкалары туруоруу буолар.

Ольга Петрова, халаантан эмсэҕэлээччи: "Хатас оскуолатыттан, бэйэбит уолбут Николай Слепцов көмө аҕалан, үлэлэһэ сылдьталлар.  Хатастан бииргэ төрөөбүт балтыларым көмөҕө кэлиэхтээхтэр. Бу кинилэр төрөөбүт дьиэлэрэ. Хайдах бу үлүгэрдээҕи ылыналларын билбэппин".

Барыллаан ааҕыы түмүгүнэн өрөспүүбүлүкэҕэ энергетика чааһыгар 57 мөл. солкуобай, хоммунаалынай эйгэҕэ 48 мөл.солкуобай, суол -иис хаһаайыстыбатыгар 48 мөл.солкуобай уонна тыа хаһаайыстыбатыгар 67 мөл.солкуобай хорумньу тахсыбыт. Оттон чуолаан Нам улууһугар халаан содулуттан 2566 киһи эмсэҕэлээтэ.

Людмила Попова, Хатырык нэһилиэгин олохтооҕо: "Дьон-сэргэ бары үтүө санааларынан, үтүө тылларынан этэн, көмөлөһөн, быраастар доруобуйабытын көрөн, хайдах эрэ санаабыт чэпчээбит курдук буолла. Бэйэбит баһылыктарбыт, хонтуора үлэһиттэрэ туох туох баарынан бары оҥордулар".

Билигин быҺааччыллары кытары волонтердар, министиэристибэлэр, араас тэрилтэлэр кэлэкэтииптэрэ, улуустар делегациялара, аймахтар уопсайынан ким да туора турбакка бары күүс халаантан эмсэҕэлээччилэргэ оҥоһуллар.