Дэгиттэр уус Уран Куудук

Бу курдук уран уус хас биирдии охсуутуттан халыҥ катанка борубулуоха сыыйа хомус моһуонун ылар, онтон олох сотору кэминэн силигин ситтэҕинэ  дьүрүскэн тыаһынан дьон-сэргэ кутун толоруо. Үйэ чиэппэрэ маһынан уһаммыт Уран Куудук кэлиҥҥи алта сылга хомус оҥоруутун ылсан, тоҥ тимиртэн араас тыастаах хомуһу оҥорор, уус бу кистэлэҥин  хас биирдии кэрчигин биһиэхэ сэгэтэн көрдөрдө, сиһилии кэпсээтэ.

Уран Куудук Дьулуур уола, уус-уран оҥоһуктарга норуот маастара: «Түүн 3-4 чаас саҕана арай кулгаахпар наһаа улаханнык киһи соһуйан уһуктар гына “аны тимиринэн уһан” диэн саҥа иһилиннэ. Соһуйан ойон турдум. Оҕо сылдьан хомус оҥоруом диэбиппин өйдөөн кэллим. Игииннэн оҥороллоро буолуо диэн игииннэн аалан хомус быһыытын хайаҕаска уган олуйан оҥордум. Онтон дьэ хомус сатанан барда».

Хомус оҥоһулларыгар аан бастаан ким бу хомуһунан оонньуура көрүллэр, дьахтар, эр киһи, оҕо хомуһа диэн тус туһунан арахсан ананан оҥоһуллар, манна оҥоһук уһуна, кылгаһа, тыла, тылын чыычааҕа сакаасчыт баҕатынан буолар.

Уран Куудук оҥорбут хомустара Саха сирин араас муннуктарыгар тарҕаммытын таһынан, Арассыыйаҕа ону ааһан Кэрийэҕэ тиийэ хоҥкунуур тойуктарын иһитиннэрэ сылдьаллар.

Дьоҕурдаах киһи барыга бары эргиччи дэгиттэр буолар дииллэринии Уран Куудук унтуу уулларыытыттан саҕалаан, маһынан-тимиринэн уһанарын таһынан кэлин эбии туойунан дьарыгырар. Ону тэҥэ удьурхайтан эмиэ араас иһит-хомуос эгэлгэтин оҥорон холонор.

Уран Өрөспүүбүлүкэ араас улуустарыгар ыһыахтыыр түһүлгэлэри, киирэр аартыктары сахалыы-сиэри туому толору тутуһан оҥорбутун кэпсиир.

Уран Куудук Дьулуур уола, уус-уран оҥоһуктарга норуот маастара: «Бастаан оҥорорго алгысчыт сиэрин-туомун ыытар, кини кэннэ оҥоро сылдьан бэйэҥ сиэрин-туомун оҥороҕун. Уот оттон, Аал уот иччитин аһатан. Бу хас сэргэ түгэҕэр сылгы маҥан сиэлин угаҕын».

Мантан сайын Сахалыы тыыны иҥэринэ сылдьар уус киһи Уран Куудук үлэтэ хамнаһа өссө элбиир, ол курдук ыһыахха анаммыт саамал кымыс иһитин - чороону оҥорууттан саҕалаан, ыраастаныыга анаммыт туойтан оҥоһуллар холумтаныгар тиийэ.