«Азия оҕолоро» оонньууларын эбийиэктэригэр өрөмүөн үлэлэрэ бара турар

Модун успуорт комплекс уораҕайыгар сүүрэр, ыстанар манежка саҥа муоста кутуутун үлэтэ бара турар. Бу нэдиэлэ бүтүүтэ туох баар бэлиэлэрин уруһуйдаан баран номнуо туттарыахтаахтар. Ону тэҥэ фассад өрөмүөнэ уонна сарай саҥардыыта саҕаланыахтаахтар. Оттон бу сайын күрэхтэһиилэр ааһыахтаах саалаларыгар үлэлэр номнуо түмүктэнэн тураллар.

Сергей Бандеров, "Модун" СК дириэктэрин солбуйааччы: «Улахан өттө – кырыысабыт өрөмүөнэ саҕаланна. Икки бэдэрээтчиттэри кытта үлэлэһэ сылдьабыт. Олор ыам ыйын бүтэһигэр үлэлэрин туттарыахтаахтар».

"Эллэй Боотур" комплекс өрөмүөнэ түмүктэнэрэ эмиэ кыра хаалла. Билигин тутуу өһүөтүн  шпатлевката, эркиннэри кырааскалааһын уонна ааннар уларыйаллара хаалла. Маны таһынан дьиэ тас өттүгэр суол, киирэр аан, олбуор эмиэ бүтүннүү уларыйыахтаахтар. Бу курдук улахан өрөмүөн үлэлэрэ бүтэһигин 10 сыл аннаараа өттүгэр ааспыттара. Оттон аттынааҕы "Туймаада" стадиоҥҥа футболлуур хонууну уонна дьон олорор олбохторун уларыттыы үлэлэрэ бара тураллар.

Леонид Спиридонов, СӨ спорт уонна физическэй култуура миниистирэ: «Футболлуур хонууну, сүүрэр суолу, иһинээҕи өрөмүөн былаанынан баран иһэр. Бу Хомсомуол болуоссатыгар аспаал ууруута бүтэн эрэр».

Хомсомуол болуоссатыгар эмиэ саҥардыы үлэтэ ыытылла турар. Тиэхиникэ арааһа уонна үлэһиттэр күн ахсын үлэ үгэнигэр сылдьаллар. Манна эргэ аспаалы көтүрэн саҥаны уураллар. Бу болуоссакка араас тэрээһиннэр, кэнсиэрдэр уонна "Азия Оҕолоро" оонньуулар кыайыылаахтарын наҕараадалааһыннара ааһыахтара.

Леонид Спиридонов, СӨ спорт уонна физическэй култуура миниистирэ: «Биһиги өрөмүөммүт үлэлэрэ барыта ыам ыйын 31 күнүгэр дылы болдьохтоохтор. Эбийиэктэрбитин бэрэбиэркэлиир хамыыһыйаҕа туттараммыт 8 оонньууларга барыта бэлэм буолуохтаах».

Маны тэҥэ тиэхиникэ хаарбах туруктаах дьиэлэри көтүрэ сылдьар.  Бу сыл устата уопсайа 50-тан тахса дьиэ көтүрүллүөхтээх. Онон тупсарыылар спорт эбийиэктэргэ эрэ буолбакка бүтүн куорат үрдүнэн ыытылла тураллар. Киин куорат олохтоохторо Дьокуускай сайдарын көрөннөр үөрүүлэрин үллэһиннилэр. "Азия Оҕолоро" баар буолан хас сырыы ахсын сайдыы суолугар үктэнэрбит хас да бүк түргэтиир диэн бигэргэттилэр.

Сыралаах үлэлэр түмүктэрин бэс ыйын саҕатыгар илэ харахпытынан көрүөхпүтүн сөп буолуоҕа. Киин куорат биллэ киэркэйиэҕэ, ырааһырыаҕа. Успорт комплекстар ааннарын Саха сирин олохтоохторугар уонна ыалдьыттарыгар тэлэччи арыйыахтара.