Дьокуускай ипподромугар Кыайыы күнүгэр аналлаах ат сүүрдүүтэ буолла

Старт бэриллэн аттар түһүнүллэр. Улуу кыайыыны уруйдаан дьөһөгөй куттаахтар, ат сүүрүүтүн сэҥээрээччилэр киин куорат ипподромугар муһуннулар. Ыһыытаан-хаһыытаан, өрө күүрүүлээх тыҥааһыннаах киирсиилэри биир тыынынан көрдүлэр.

Трибуна томточчу туолан, уһун кыһын устата бэлэмнэммит сүүрүк аттары көрөөрү сүүһүнэн киһи муһунна. Кимнээх эрэ харчы уксан оонньоон үптэрин үлүннэрэр, оттон сорохтор кэнсиэр көрөр соруктаах кэлбиттэр. Ол эрэн хас биэтэккэ кэлии ахсын бары биир тыынынан өрө ньиргийэ түһэллэр.  

2400 миэтирэҕэ Сэбиэскэй Сойуус дьоруойун Владимир Лонгинов аатынан бириискэ Мэҥэ-Хаҥалас улууһуттан Шугар Кид 2 мүнүүтэ 43 сөкүүндэ түргэнник биэтэккэ кэлэн бастакы миэстэҕэ тигистэ.

Аркадий Лукин, Мэҥэ Хаҥалас улууһун ат сүүрдүүтүн федерациятын салайааччыта: «Биһи улууспутугар ат сүүрдүүтүн сүрдээҕин өйүүбүт. Норуот ирдиир ону. Мэҥэ Хаҥалас улууһун нэһилиэктэригэр ат спордунан дьарыктар дьоннор элбэхтэр, ытыктыыр-убаастыыр убайдарбыт. Ол иһин маннык утумнаахтык дьарыктанабыт».

Саха сиригэр сыллата ат сүүрдүүтүн сезона Улуу Кыайыы күнүгэр саҕаланар. Бу күнтэн ыла Өрөспүүблүлүкэ араас муннуктарыгар, сайын устата 15 күрэхтэһии, ат сүүрдүүтэ былааҥҥа киирэн турар. Саамай күүтүүлээх уонна кэтэһиилээх сүүрүүннэн аны сайын буолуохтаах Туймаада ыһыаҕар Ил Дархан бирииһэ.  

Семен Гаврильев, ат миинээччи: «Хара сарсыардаттан киэһээҥҥэ дылы бэлэмнэммит үлэбит түмүгэ. Бу саҥа саҕалааһыммыт, улахан сүүрүүлэр сайын буолаллар. Быйыл Ил Дархан бирииһигэр кыттаары сылдьабын».

Уопсайа 8 дистанцияҕа 43 сүүрүк ат кииристэ. Хас миэстэ ахсын уу харчыннан бириистээх. Быйылгы бириис уопсай сууммата балтараа мөлүйүөн солкуобай.

Александр Капитонов, СӨ ат сүүрдүүтүн федерациятын толорооччу дириэктэрэ: «Аҕа дойду улуу сэриитин дьоруойдарыгар анаммыт сүүрүү. 8 дьоруой аатынан 8 сүүрүү буолла. Уопсай бириис – 1 500 000 уу харчынан. 43 сүүрүк сылгы кыттар»

Ат сүүрдүүтүн сезонун арыллыыта Кыайыы күнүгэр буолара мээнэ буолбатах. Аҕа дойду улуу сэриитин кэмигэр тыһыынчаннан саха сылгыта, ата фроҥҥа көмөҕө барбыттара.

Аны мантан сайын ат сүүрдүүтүн спордугар саҥаттан саҥа ааттар, аттар тахсаллара күүтүллэр. Дьөһөгөй куттаах дьон аттарын миинэн, сүүрдэн кыайыыга дьулуһуохтара.