Дьокуускай былассааккаларыгар сарсыардааҥҥы сэрээккэлэр саҕаланнылар

Сэрээккэни успуорт маастардара, чөмпүйүөннэр ыыттылар. Хас биирдиилэрэ бэйэлэрин сарсыардаттан уһугуннарар сүрүн уонна таптаан оҥорор эрчиллиилэрин, сүбэлэрин олохтоохторго көрдөрдүлэр. 200-тэн тахса киһи мустан, бары биир киһи курдук хамаанданан оҥороллор.

Дьокуускай куорат олохтооҕо, хайыһарга арассыыйа успуордун маастара Матвей Лыткин билэр дьонун көҕүлээн сарсыардааҥы сэрээккэҕэ көтүппэккэ сылдьар. Бэйэтин өйдүөҕүттэн успуордунан дьарыктанар буолан, киһи этин-сиинин бэйэтин кыаҕын иһинэн эрчийиэхтээх диэн өйдөбүл киниэхэ нуорма быһыытынан буолар.

Матвей Лыткин, Дьокуускай куорат олохтооҕо: «Быйылгы дьыл оһуобай суолталаах. “Азия оҕолоро” оонньуулар буолаллар уонна куорат баһылыга бэйэтэ кэлэн сөбүлүүр дьарыктарын көрдөрөн, спортсмен буолан дьону көҕүлээн куораппыт спортивнай буолуохтаах. Ол иһин сэрээккэҕэ хайаан да кыттыахтаахпыт диэн үөрэ сылдьабыт».

Дьокуускай куорат салайааччыча Евгений Григорьев олохтоохтору көҕүлээһиҥҥэ биир бастакынан кытынна. Бэйэтэ күн аайы спордунан дьарыктанар буолан, олохтоохторго дьиссипилиинэнэн үтүө холобур буолар.

Евгений Григорьев, Дьокуускай куорат баһылыга: «Физкультура хамсааһына Саха сиригэр олохтоммута сүрдээх үөрүүлээх. Николай Николаевич Тарскай 100 сыл аннараа өттүгэр саҕалаабытынан бүгүн  биһиги олимпийскай чемпионнардаахпыт, Аан дойду чемпионнардаахпыт. Уонна хас биирдии Саха сирин олохтооҕо спорду сөбүлүүрү көрдөрөн бу сэрээккэ буолар».

Дьокуускай куоракка 26 болуоссатынан уонна сквердэринэн дьарыктар ыытыллыахтара. Сайын устата таһырдьа, чэбдик салгыҥҥа, дьарыктанарга аналлаах саҥа тутуулар киириэхтэрэ. Оччоҕуна, куорат хайа баҕарар муннугар олорор дьон бу үтүө үгэскэ кыттыһар кыахтара, баҕалара улаатыа.

Болуоссат үрдүнэн биир интэриэстээх дьон түмсэн, санаа атастаһан астынан бардылар. Аҕам саастаахтар күн аайы сылдьар буолуохпут диэн болдьоһон үөрүүлэрэ үгүс.

Леонид Спиридонов, СӨ спорт уонна физическэй култуура миниистирэ: «Биһиги улуу киһибит – Николай Николаевич Тарскай үбүлүөйдээх сыла, төрөөбүтэ 100 сыла буолар. Ол иһин бу сылга сүрдээх элбэх тэрээһиннэри ыытабыт. Уонна сахабыт сирин дьонун сэргэтин барытын хас сарсыарда аайы биһиги куораппыт болуоссаттарыгар сэрээккэҕэ ыҥырабыт».