Хаарбах дьиэттэн көһөрүү салҕанар

Саха сирин үрдүнэн 2012-2017 сылларга 3600 хаарбах дьиэ  көһөрүү бырагырааматын иккис түһүмэҕэр  киирбитэ. Хаарбах дьиэттэн көһөрүү бырагырааматын иккис түһүмэҕэ 2019 сыллаахтан олоххо киирэр. Бэлиэтээн этэххэ, куорат үрдүнэн биир тыһыынча кэриҥэ мас дьиэ баар, ол дьиэлэргэ 40-тан тахса тыһыынча киһи олорор.

Бу олохтоохтору барыларын былаан быһыытынан 2030 сылга диэри көһөрөр улахан сорук турар. Маныаха сыллата бу хайысхаҕа үлэ тэтимнээмник ыытыллар. Төһө даҕаны ыарахаттар баалларын үрдүнэн былааны болдьоҕор диэри толорор соруктаахтар. Холобура, киин куоракка норуокка биллэринэн 17 кыбаарталга, билигин "Спортивнай" түөлбэттэн  быйылгы сылга 11 хаарбах дьиэттэн дьону көһөрүөхтэрэ.  Оттон "Азия оҕолоро" спортивнай оонньууну көрсө уопсайа 17 дьиэ көтүллүөхтээх. 

Виктор Романов, СӨ тутуу миниистирэ: "Куорат информациятынан оонньууларга диэри 17 дьиэ көтүрүллүөхтээх, көһөрүллүөхтээх. Дьиэ турбут сирин куттаран, тэҥнээн оҥоруллуохтаах. Онтон хаарбах дьиэттэн көһөрүү бырагырааматын туһунан этэр буоллахха, 2019 сылтан өрөспүүбүлүкэ үрдүнэн 904 дьиэ көтүлүннэ. Оттон 800 дьиэ өссө да көтүллүөхтээх. Дьокуускайга бу бырагыраама үлэлиэҕиттэн 140-ча дьиэ көстө".

Оттон быйылгы сылга Саха сиригэр уопсайа 93 дьиэ тутуллан үлэҕэ киирэрэ күүтүллэр, бу квадратнай миэтэрэнэн ыллахха 150 тыһыынчаҕа тэҥнэһэр.  Ааспыт сылга 100 дьиэ тутуллубута. Оттон  2017 сыл кэнниттэн бу билиҥҥэ диэри тыһыынчан  хаарбах дьиэ баара биллэр. Биллэн турар, сыллата эргэ хаарбах дьиэ ахсаана эбиллэн иһэр. Кинилэр иэннэрин кээмэйэ хаарбах уонна аварийнай дьиэ туһааннаах реестрыгар тиһиллэн киирэ турар.  Холобура, бу кэнники икки сылга уопсайа 6 тыһыынчаттан тахса киһи олорор усулуобуйатын тупсарбыта. Бу сыл бастакы кыбаарталыгар республика үрдүнэн 50 дьиэ тутуллан үлэҕэ киирэр диэн былааннаабыттара.

Игорь Алексеев, СӨ олорор дьиэни-уоту тутуу дирекциятын программалары олоххо киллэриигэ салаатын начальнига: "Бу сылга 300 тыһ. тахса кыбадыраатынай миэтэрэни көһөрүөхтээхпит. Манна олорор дьон ахсаана 18 тыһыынчаҕа тэҥнэһэр. Үбүлээһин 17 миллиард солкуобай. 2025 сыл ортотугар диэри мөлүйүөнтэн тахса кыбадыраатынай миэтэрэни көһөрүөхтээхпит".

Көһөрүү программатыгар киирсэргэ эргэ хаарбах дьиэ олохтоохторо кыттыыһан сайабылыанньа суруйаллара эрэ ирдэнэр, онтон дьиэ техническэй туругун экспертизалааһын оросхуотун муниципальнай бюджет бэйэтэ уйунар.Көһөөччүлэр квартиранан биитэр харчынан компенсация ылыахтарын сеп. Компенсация ылар түгэнигэр хаһаайын дьаһалтаны эрдэттэн сэрэтиэхтээх. Улуустарынан ыллахха саамай элбэх хаарбах дьиэлээхтэринэн Алдан, Нерюнгри, Ленскэй, Мэҥэ-Хаҥалас улуустара буолаллар