Дьокуускайга 19 суол өрөмүөннэниэ

Мархаҕа киирии суол быйыл өрөмүөннэммитэ иккис сылыгар барда. Улахан тиэхиньикэ быыстала суох тигиниир. Экскаватор тыаһа ыраахтан иһиллэр. Өрөмүөн кэмигэр суолу бүтүннүү саппаттар. Улахан мэһэй үөскээбэтин туһуттан  бу кэрчиккэ  өрөмүөн барарыгар кыйа ааһар быстах хайысхалары бэлэмнээбиттэрэ.

Ньургустаан Семёнов, учаастак маастара: "Уу турбата барар сирин хаһа сылдьабыт. Итиэннэ сибээс линията угуллар дьааматын хаһабыт. Бу кэннэ уот баҕаналарын туруортуохпут".

Манна 3,5  килэмиэтир усталаах суол өрөмүөннэнэр. Оҥоһуллар суол кэҥээн улаатан, түөрт балаһалаах буолуоҕа. Ортотунан балаһалары араарар күрүөлээх, суол икки өттүттэн туһааннаах сырдатыылаах буолуоҕа. Онон уот баҕаналарын туруоруохтара. Сатыы сылдьааччыларга эмиэ усулуобуйа оҥоһуллуоҕа, ол курдук тротуардар, светофордар, автобус тохтобуллара киириэхтэрэ.

Быйыл Дьокуускайга 19 суол өрөмүөннэниэ. Барыта 30-тан тахса килэмиэтир саҥардыллыа.

Сүрүн үлэ Можайскай уулуссаҕа ыытыллыаҕа. Хаһыы үлэлэрин түмүктээн ууну ыытар лотуоктары уурууга бэлэмнииллэр, маны тэҥэ уот остуолбаларын көһөрүүгэ үлэ барыаҕа. Сүрүн үлэлэр ааспыт сылга ыытыллыбыттара. Ол курдук 900 миэтэрэ учаастакка икки хос аспаал уурбуттара. Уулуусса кэҥээн 4 эмиэ балаһалаах, эргиир учаастактаах буолуоҕа, уһуна 2 киэмиэтиртэн тахса, Пилот уулуссатыттан Строд уулуссатыгар диэри. Улахан болҕомто эргиир суолга ууруллар, былырыын манна буорун, төрдүн уларытыы барыта ыытыллан турар. 

Владимир Макаров, "Главстрой" тэрилтэ суол тутуутугар салаатын салайааччы: "Мантан сайын сүрүн үлэбит Можайскай уулуссатыгар барыаҕа. “Азия оҕолорун” иннинэ күүстээх үлэ саҕаланна. Маны сэргэ элбэх оҕолоохторбутугар суол оҥоруутун салгыыбыт".

"Умнас" суолга куораттан Покровскайдыыр тахсыыга оҥоһулла сылдьар аҕыс килэмиэтиртэн тахса усталаах учаастак өрөмүөнүн түмүктүөхтэрэ. Маны тэҥэ куораттан тахсыыга Намныыр суол учаастагын өрөмүөнэ эмиэ бүтүөхтээх. Нам улууһугар уопсайа 10 килэмиэтир суолу оҥоруохтара. Ону таһынан Амма, Мэҥэ Хаҥалас, Уус Алдан,Таатта, Мииринэй, Бүлүү улуустарыгар суолу саҥардыы үлэлэрэ ыытыллыахтара. Улуустарынан ыллахха быйыл өрөспүүбүлүкэ үрдүнэн уопсайа 150-ча килэмиэтир кэриҥэ өрөмүөн үлэтэ былааннанан турар.