"Азия оҕолоро" спортивнай оонньуулар кыттыылаахтара бары устудьуон уопсайыгар түһүөхтэрэ

Устудьуон куората мааны көстүүлээх буоларын туһугар үлэһиттэр күн өрөбүлэ суох үлэ үгэнигэр сылдьаллар.

7№-дээх уопсай саҥа арыллыаҕыттан ыла 20 сыл устата биирдэ даҕаны хапытаалынай өрөмүөн диэни көрө илик. Онон уопсай үлэһиттэрэ үөрүүлэрэ үгүс. "Азия оҕолоро" уопсай ис-тас көстүүтэ тупсарыгар күүс-көмө буолла диэн бигэргэтэллэр.

Антонина Тимофеева, 7№ -дээх уопсай дьиэ комендаана: “Хос аайы муостата уларыйыа, истиэнэтэ кырааскаланыа. Оронноро, ыскааптара, остуоллара уларыйыа. Биһиги 408 оҕону көрсүөхтээхпит. Уопсайбыт 2004 сылтан “Азия оҕолорун” кыттааччыларын түһэрэбит”.

Уопсайдары тупсарыы үлэлэрэ бу ый устата ааһыахтара. Оттон кэлэр ый ортотуттан номнуо ыалдьыттары түһэрэн саҕалыахтаахтар.

Үлэ түмүгүнэн уопсай сарайа ардаҕы, хаары тулуйумтуо буолуохтаах. Маны таһынан дьиэ тас көстүүтүгэр эмиэ улахан болҕомто ууруллар. Үлэҕэ альпинистар кыттыһаллар, уонунан сыл кырааскаламматах истиэнэлэри саҥардаллар.

Устудьуон куората тупсарын көрөн Хотугулуу-Илиҥҥи федеральнай университет үөрэнээччилэрэ бэйэлэрэ эмиэ үөрүүлэрин үллэстэллэр. Эһиилги үөрэх дьылыгар саҥа өрөмүөннээх уопсайдарга киирээри номнуо тиэтэйэллэр.

Семён Cмирников, устудьуон: “Ыалдьыттар тупсаҕай көрүҥнээх уопсайдарга кэлэттэрэ бэттээхэй, күһүн бэйэбитигэр да үчүгэй”.

Максим Пермяков, устудьуон: “Араас омук ыалдьыттара өрөмүөннээх уопсайга киирэллэр олус үчүгэй”.

Өрөмүөнү таһынан ыалдьыттары хайдах быһыылаах көрсөрү, ханнык уопсайдарга хайа дойду хамаандаларын түһэрэри эмиэ быһаарсаллар. Онно анаан университет иһинэн быстах кэмҥэ "Мэрия деревни спортсменов" диэн туспа тутул тэрилиннэ.

Пётр Борисов, устудьуон куоратын дириэктэрэ: “3400 кэриҥэ кыттааччы кэлиэхтээх. Бары биһиги уопсайдарбытыгар түһэллэр. Ону көрсөөрү бэлэмнэнии күүскэ бара турар. Бэс ыйын ортото номнуо ыалдьыттары көрсөн саҕалыыбыт. "Мэрия деревни спортсменов" диэн саҥа тутул тэриллибитэ. Кинилэр “Азия оҕолоро” дирекцияны кытары ыалдьыттары түһэрии былааныгар үлэлэһэ сылдьаллар”.

Ыалдьыттар кэлэллэрэ ыйтан эрэ ордук кэм хаалла. Онон бэлэмнэнии үлэлэрэ күн өрөбүлэ суох ааһаллар.