Олоҥхо дьоруойдарынан саахымат

Үрүҥнэргэ Ньургун Боотур, Үрүҥ Уолан, Туйаарыма Куо, онтон хараларга Кыыс Кыскыйдаан, Уот Уһутаакы. Саахыматы оҥорууга бу курдук табыгастаахтык орто дойду дьоно уонна аллараа дойду абааһылара  хонуу икки өттүгэр утарыта турбуттар.  Бу фигуралар номнуо оҥоһуллан бүтэн эрэллэр. Сорохторо кырааскаланаллара эрэ хаалбыт. Оҥоһуктар маннык көрүҥнэниэхтэригэр диэри улахан хамаанда хас да түһүмэхтээх үлэтин ааһар. Аан бастакы үлэни скульптор Софрон Степанов компьютерга таҥан  оҥорор.

Софрон Степанов, скульптор: "3Д модель бастаан оҥоһуллар. Барыта тус туһунан таҥыллар. Ол да буоллар мин ыарырҕаппатаҕым".

Онтон ЧПУ диэн анал станокка быһыллар. Ол кэннэ скульптордар хас биирдии фигураны кыһан, чочуйан таһаараллар. Онон манна илии үлэтэ, тарбах талаана улахан оруоллаах. Юлия Федорова бөрө буолан тахсыахтаах оҥоһугу хас биирдии түүтүн бу курдук быһар.

Юлия Фёдорова, скульптор: "ЧПУ станок син биир тэҥэ суохтук таһаарар. Ону барытын илиибитинэн кыһан ситэрэн биэрэбит. Ол кэннэ кырааскалааччыларҕа салгыы барар".

Дьэ онтон, аттынааҕы хоско маннык фигура омооно тахсыбытын кэннэ кытаатыннарыы, кырааскалааһын үлэтэ саҕаланар. Саахымат аһаҕас халлаан анныгар таһырдьа туруохтаах. Онон күн - дьыл уларыйыытын тулуйумтуо буолара ирдэнэр. Ардаҕы да хаарыа да билиниэ суохтаах. Аны оонньонор буолан ыйааһына чэпчэки буолан тахсыахтаах. Маныаха уопуттаах хамаанда кистэлэҥҥэ тутар састаабын туттар. 

Николай Афанасьев, скульптор: "Икки хос кытаатыннарар кыраасканан сотобут. Оччоҕо кыбыс-кытаанах буолар".

Ураты саахымакка олоҥхо сүрүн дьоруойдара киирбиттэр. Холобура, Туйаарыйма Куо, Ньургун Боотур, Үрүҥ Уолан хоуроллар, слон оннугар сэргэ, оттон утарсааччы хара слону чөҥөчөк солбуйар. Пешкалары тута дьон араардын диэн олорор гына оҥорбуттар.

Айаал Фёдоров, косплеер: "Фигураларбытын бүтэрэн эрэбит, биир эрэ хаалан турар. Олоҥхо сүрүн дьоруойдарын саахымаппытыгар туһанныбыт". 

Айаал Федоров өрөспүүбүлүкэҕэ соҕотох косплеер. Кини хамаандата билигин "Азия оҕолоро" спортивнай оонньууларга хас да арт-эбийиэги бэлэмниир. Оттон бу ураты саахымат эмиэ "азия оҕолоро" дириекциятын сакааһынан оҥоһуллар. Фигуралары бүтэрдэхтэринэ салгыы хонуутун оҥорууга киириэхтэрэ, баараҕай кээмэйдээх дуоска ураты матырыйаалтан оҥоһуллуо.

Олоҥхо дьоруойдарынан саахымат бэс ыйын саҥатыгар Култуура уонна сынньалаҥ пааркатыгар туруоҕа. Манна ким баҕалаах кэлэн саахымакка сатабылын холонон көрүөн сөп.