"Хаксык" бөдөҥ хаһаайыстыбаҕа быйыл үүт дэлэгэй

Икки хотонунан үлэ сарсыардаттан күөстүү оргуйар. Раиса Никулина саҥа төрөөбүт ньирэйдэри көрөр-истэр кини бу хотоҥҥо үлэлии кэлбитэ иккис ыйыгар барда. Ньирэйдэри ыйдарынан арааран тус-туспа далга туруораллар. Хаһаайкалара оҕолорун хас биирдиилэрин атаахтатар, күҥҥэ үстэ аһатар.

Раиса Никулина, "Хаксык" ТХПК ньирэй көрөөччүтэ: «Билигин биһиэхэ 100 тахса төбө турар. Соторутааҕыта атыылаабыппыт. Дьон 5-6  төбөнү ылаллар».

Хаһаайыстыба  2015 сыллаахха саҥа хотон туттан киирбитэ. 150 төбөҕө анаммыт хотон сылытыыта гааһынан барар. От былаанын куруук үчүгэйдик толорор буоланнар, ас өттүгэр кыһалҕа суох. Сиилэстэрин төрөөбүттэрин кэннэ дэлэйдик биэрэ сылдьаллар. Онон үүттэрэ эмиэ хаачыстыбата үчүгэй, былаана туолар. Быйыл былырыыҥҥытааҕар элбэх үүтү ыатылар. Кээпэрэтиип бэрэссэдээтэлэ хаһаайыстыбатын тупсарар, кэҥэтэр ханнык бырагыраамаларга кыттарын кэпсээтэтэ.

Тамара Осипова, "Хаксык" ТХПК бэрэссэдээтэлэ: «Тыа хаһаайыстыбатын министиэристибэтин ыытар бары бырагыраамаларыгар кытта сатыыбыт. Ол курдук “Кормопроизводство” бырайыакка кыттан тиэкиньикэбитин саҥардабыт».

Үүттэрин быйыл кыһыны быһа Хаҥаластааҕы бэйэ аһын оҥорон таһаарар тэрилтэҕэ туттардылар. Күҥҥэ 700-тэн тахса лиитэрэ үүтү туттараллар. Бастыҥ хаачыстыбалаах ас дьоҥҥо тиийэригэр бары сыраларын уураллар. Үүттэрин, отторун былаанын быйыл уларыйбакка, уруккутунан хаалларыахтара. Оттон хаһааайыстыба хаалбыт отучча ынаҕын сайылыкка көһүөхтэригэр диэри төрөтөр баҕа санаалаахтар.

Агафья Шадрина, "Хаксык" ТХПК биригэдьиирэ: «Күҥҥэ 600-700 лииэтэр үүтү ыыта турабыт».

Кээпэрэтиип отут сылын көрсө үлэһиттэргэ саҥа дьиэ туттаран киирбиттэрэ. Бу иннинэ хотоҥҥо бэйэтигэр олорон сынньанар эбит буоллахтарына, билигин чэй иһэн, сытан ылар муннуктаммыттарыттан үлэһиттэр олус үөрэллэр.