"Азия оҕолоро" спортивнай оонньууларга диэри 17 дьиэни көтүрүөхтэрэ

Бырабыыталыстыба бэрэссэдээтэлин бастакы солбуйааччы Дмитрий Садовников өрөмүөннэнэ сылдьар кэккэ эбийиэктэргэ үлэ хаамыыта хайдах баран иһэрин билистэ. Маршрут бастакы миэстэтинэн 202 түөлбэҕэ баар Роман Дмитриев аатынан кытыл буолла. Быйыл бу кытылга тупсарыы үлэтэ барыаҕа. 

Билигин манна бэдэрээччит тэрилтэ күрүө, олбуор оҥоруутугар ылсан үлэлэһэ сылдьар. Сахаттан бастакы Олимпийскай чемпион Роман Дмитриев аатын бу кытылга 2018 сыллаахха иҥэрбиттэрэ.Тупсарыы үлэтэ Дьокуускайга суол өрөмүөнүн кытта дьүөрэлии ыытыллар.

Владимир Макаров, "Главстрой" тэрилтэ суол тутуутугар салаатын салайааччы: "Быйыл Дьокуускайга 19 уулуссаҕа өрөмүөн үлэтэ бара турар. Уопсай уһуна 31 килэмиэтир буолар. Ону таһынан тупсарыыга үлэлэр бараллар. Холобура, Роман Дмитриев аатынан кытылы оҥорууга таһымнаах үлэ бара турар. Билигин кытыл күрүөтэ оҥоһулла сылдьар, ону тэҥэ пляж туругун чинчийии, күрүөлээһин бара”.

Салгыы Дмитрий Садовников салайааччылаах бөлөх куорат киин уулуссаларыгар баар көтүрүүгэ барбыт дьиэлэр эргин санитарнай туругу бэрэбиэркэлээтэ. Ол курдук бу хайысхаҕа үлэ ситэтэ суоҕун ыйда, ону тэҥэ соторутааҕыта ыытыллыбыт субуотунньуктар кэннэ бөхтөөх кууллары тиэйии бытаанын эмиэ эттэ.

Виктор Романов, СӨ тутуу миниистирэ: "Куорат информациятынан оонньууларга диэри 17 дьиэ көтүрүллүөхтээх, көһөрүллүөхтээх. Дьиэ турбут сирин куттаран, тэҥнээн оҥоруллуохтаах".

Хомсомуол болуоссатыгар эмиэ саҥардыы үлэтэ ыытылла турар. Манна эргэ аспаалы көтүрэн, саҥаны ууруохтара. Онно бэлэмнэнии тэрээһинэ барар. 

Анатолий Алексеев, тутар тэрилтэ дириэктэрэ: "Эргэ аспаалы уста сылдьабыт уонна эргэ сыбаайалары туурталыыбыт. Бу ый ортотугар аспааллаан саҕалыахпыт".

Сайсары күөл тула тупсарыы үлэтэ эмиэ ыыттыллыаҕа. Бу күөл кытыла куоластааһыҥҥа икки сыллааҕыта кыайан, үп-харчы көрүллэн үлэ саҕаламмыта. Онтон салгыы куорат маастар-былааныгар киирсэн күөл эргиччи оҥоһуллуохтаах. Бэрэбиэркэ түмүгүнэн Дмитрий Садовников тупсарыы үлэтин хаамыытын итиэннэ куорат санитарнай туругун көннөрүүгэ үлэлэри тэтимирдэри сорудахтаата.

Дмитрий Садовников, СӨ Бырабыыталыстыбатын бэрэссэдээтэлин бастакы солбуйааччы: "Хонтуруоллуур үлэ күүһүрэн иһэр. Ыытыллыахтаах үлэҕэ үп-харчы барыта көстөн турар. Сорох сирдэргэ инвестордары көҕүлээтибит. Дьокуускай дьаһалтата болҕомтотун ситэри уура илик".

Кэрийэн көрүү бүтэһик миэстэтинэн Ленин болуоссата буолла. Манна баараҕай өрөмүөн үлэлэрэ аны күһүн биирдэ түмүктэниэхтээхтэр. Онон сайын устата үлэ күргүөмнээхтик барара күүтүллэр.