"Ыраас пааматынньык" аахсыйа салҕанар

Биэдэрэ, тирээпкэ тутуурдаах погоннаах кыргыттар уонна Губинскай уокурук дьахтар сүбэтин кэрэ аҥардара хахсаат тыалы ахсарбакка субуотунньук-аахсыйаҕа таҕыстылар. Күн бүгүн тустаах уокурукка бойобуой дьайыыга хорсуннук охтубуттарга анаммыт мэҥэ тааһы сууйуу үлэлэрэ ыытыллан саҕаланнылар.

Губинскай уокурук дьахталларын сүбэтин биир тутаах кэрэ аҥара Светлана Ефремова кичэллээхтик, кыһаллан туран мэҥэ тааһы сууйар. Светлана кэргэнэ билигин анал байыаннай дьайыыга сылдьар, онон бүгүҥҥү тэрээһин киниэхэ икки бүк суолталаах.

Светлана Ефремова, Губинскай уокурук дьахталларын сүбэтин чилиэнэ: “Губинскай уокурук олохтоохторо бу аахсыйаҕа сыл аайы кытталлара буоллар олус үчүгэй буолуо этэ. Бүтүн куорат үрдүнэн пааматынньыктар элбэхтэр”.

"Ыраас пааматынньык" аахсыйа сыллата ыам ыйын саҥатыгар ыытыллар. Быйыл, холобура, бу Губинскай уокурук кэрэ аҥардара суолга -иискэ куттал суох буолуутун хааччыйар иниспиэксийэ үлэһиттэрин кытары бииргэ сомоҕолоон тэрээһини ыыттылар. Оттон, манна даҕатан эттэххэ, бу уоукурук дьахталларын сүбэтэ Дьокуускайдааҕы ГИБДД-ны кытары уруккуттан ыкса үлэлэһэр.

Владилена Охлопкова, Дьокуускай куорат суол-иис иниспиэксийэтин пропагандаҕа салаатын иниспиэктэрэ: “Губинскай уокурук дьахталларын кытта бииргэ үлэлэспиппит 3 сыл буолла. Ол эбэтэр араах аахсыйаларга биһигини кытта тахсаллар. Холобура, Аҕа дойду көмүскээччилэрин күнүнэн суоппардары эҕэрдэлээбиппит. Бииргэ үлэлэһии сыала-соруга суол саахалын сэрэтии”.

Түргэн - тарҕан туттуулаах аахсыйа кыттааччылара мэҥэ тааһы үрдүн, аннын кылбаччы аҕыйах бириэмэ иһигэр сууйан кэбистилэр. Маны таһынан манна турар ыскамыайкалар эмиэ сууйуллан, ырааһырдылар.

Губинскай уокурук дьахталларын түмсүүтэ урут уруккуттан бэрт таһаарылаахтык үлэлиир-хамсыыр. Оттон түмсүү общественнай үлэтин биир хайысхата  үйэтитиигэ туһуланар.

Лидия Сыроватская, Губинскай уокурук дьахталларын сүбэтин бэрэссэдээтэлэ: “Биһиги сүрэхпитигэр өрүү эһиги бааргыт” диэн бырайыак суруйбуппут. Онно пааматынньыкка QR-кодтары оҥорон ыйаабыппыт”.

Губинскай уокурукка киин куорат үрдүнэн үгүс пааматынньык баара биллэр, онон аахсыйа өссө да салҕанар. Оттон бүгүҥҥү тэрээһин түмүгүнэн, буойуттар сырдык кэриэстэригэр анаан сибэкки дьөрбөтө ууруллунна.