Ыам ыйыттан киирэр уларыйыылар

Бүгүҥҥэттэн  Дьокуускайга ыарахан уйуктаах массыыналар сырыыларыгар хааччах киирэр. Ол курдук бу ый устата 8 туоннаттан үөһэ ыйааһыннаах көлөлөр киин куорат устун айанныыллара бобуллар. Онтон бэс ыйыттан атырдьах ыйа бүтүөр диэри куорат иһинээҕи суолларга күнүскү өттүгэр ыарахан уйуктаах массыыналар сылдьыылара тохтуур.  Маннык быстах кэмнээх хааччах  суолу харыстыыр сыалтан оҥоһуллар. Тоҕо диэтэр сайыҥҥы куйааска аспаал сымныыр.

Бу ый 3 күнүгэр балбаах сокуона олоххо киирэр. Дойду президена Владимир Путин ынах, сылгы сүөһү балбааҕын сыыһа харайыы иһин ыстараабы 600 тыһыынча солкуобайга диэри үрдэтэр сокуоҥҥа илии баттаан турар. Харайыы, тиэйии, атыы ирдэбиллэрин кэһии түгэнигэр дуоһунастаах сирэйдэри 40 тыһ. солк. диэри, онтон урбаанньыттары 50-60 тыһ. солк. уонна юридическэй сирэйдэри 350 тыһ. солк. тиийэ ыстарааптыахтара. Маны таһынан урбаанньыттары 90 күҥҥэ диэри үлэлэрин тохтотуохтарын сөп.

Ыам ыйыттан  чааһынай тэрилтэлэр тас дойду дьонуттан нуучча тылыгар эксээмэн туппат буолуохтара. Онон регионнар судаарыстыбаннай үрдүк үөрэх тэрилтэлэрин кытта дуогабар түһэрсиэхтэрэ. Хас биирдии субьекка эксээмэн ыытыллыытыгар чопчу университет эппиэттиэхтээх.

Ыам ыйын 1 күнүттэн дойдуга болдьоҕо тахсыбыт бородууктаны утары миэрэлэр үлэлээн саҕалыахтара. Ол курдук буорту буолбут үүт аһы уонна ууну бөдөҥ маҕаһыыннартан ылар хайдах да кыаллыбат буолар. Тоҕо диэтэххэ каассалар маннык табаары кыайан охсубат гына оҥоһулуннулар. Маннык миэрэ көҥүлэ суох уонна эргэ табаар атыытын утарсар туһугар ылылынна.

"Работа России" диэн порталга тэрилтэлэр тус сыаллаах үөрэттэриигэ  наадыйалларын туһунан биллэрии таһаарар буолуохтара. Онон үрдүк үөрэх кыһатыгар киирээччилэр бу сайтка инникитин үлэ биэрээччилэрин эрдэттэн булар кыахтаннылар.

Муус устарга 80 саастарын туолбут кырдьаҕастарга, ону сэргэ 1 группалаах инбэлиит буолбут дьоҥҥо пенсиялара үрдүөҕэ.