Ыччаттар айылҕаны харыстыыр бэстибээлгэ түмүстүлэр

Актыбыыстар "Чистая земля Олонхо" тэрээһин чэрчитинэн Дзержинскэй, Лермонтов, Ойуунускай, Поярков уулуссаларын ыраастаатылар. Ян Адамов субуотунньук ыытыллар эбит диэн биллэриини истэн баран, өр толкуйдуу барбакка доҕотторун кытары үтүө дьыала туһугар үлэлии тахсыбыт.

Ян Адамов, "Зёма" ыччат тэрилтэтин актыбыыһа: "Куораппыт ыраас буоллун диэн хомуйа таҕыстым. Төһө да тыаллаах-куустаах тымныы күн турдар өрөспүүбүлүкэбит туһугар тахсабыт. Дууһам чэпчиир куораппын ыраас оҥорорбуттан".

Сылын ахсын ыытыллар субуотунньукка уопсайа 300-тэн тахса актыбыыс кыттыыны ылла. Өрөспүүбүлүкэ араас муннуктарын актыыбынай ыччаттара биир сомоҕо буолан күүстэрин-уохтарын үтүө дьыалаҕа көрдөрдүлэр. Саха сирэ туспа өрөспүүбүлүкэ аатын сүгэригэр сүүрбүт-көппүт улуу убайдарга сүгүрүйдүлэр.

Никита Аянитов, "Чистая земля Олонхо" бэстибээл сүрүн тэрийээччитэ: "Уопсайа 300-чэкэ ыччат куораппыт, дойдубут ыраас буоларын туһугар чэбдик салгыҥҥа тахсан үлэлэһэ сылдьаллар. Сирбитин – уоппутун ыраастык тутуоххайыҥ, чөл салгынынан тыыныаххайыҥ, дойдубутун таптыаххайыҥ. Улуу убайдарбытыгар Өксөкүлээккэ, Ойуунускайга, Бараховка, Аммосовка сүгүрүйүөххэйиҥ, махтал тылларын этиэххэйиҥ".

Бэстибээл чэрчитинэн уопсайа 5 күн устата биэс тэрээһин ыытылынна. Актыбыыс устудьуоннар өйдөрүн-санааларын, эттэрин-сииннэрин тургутан көрдүлэр. Анал байыаннай дьайыыга сырдык тыына быстыбыт Евдоким Ушницкай сырдык кэриэһигэр анаан киниэхэ сыһыаннаах, кини сөбүлүүр дьарыктарыгар сиэттэрэн тэрээһиннэр ыытылыннылар.

Ян Прокопьев, "Зёма" ыччат тэрилтэтин актыбыыһа: "Евдоким Ушницкай спортсменын иһин кини сырдык аатын үйэтитээри, оҕолорго спортивнай күрэхтэһиилэри оҥордубут. "Чистая земля Олонхо"  бэстибээл оҕолору айылҕаны харыстыырга, ыһа-тоҕо сылдьыбакка үөрэтэр".

Бу курдук, устудьуоннар түмсэн төрөөбүт дойдуга тапталларын, сүгүрүйүүлэрин көрдөрдүлэр. Өрөспүүбүлүкэ күнүгэр Саха сирин, Арассыыйа уонна "Зёма" былаахтарын өрө күөрэттилэр.