Саха сирин олохтоохторо "Кыайыы диктанын” суруйдулар

Саха сирин сүрүн библиотекатын дьиэтигэр күнүскүттэн норуоттар икки ардыларынааҕы киэҥ хабааннаах "Кыайыы диктана" диэн историческай акцияҕа кыттаары биирдиилээн дьон кэлитэлиир. Саастаах, эдэр даҕаны, орто да саастаахтар элбэхтэр. Киирээт да тута регистрация ааһан, бланка ылан суруйар саалаҕа киирэр. Куорат олохтооҕо Александр Тарасов: "Хас биирдиибит дойдубут историятын хайаан да билэрбит наада, уруккута суох инники суох", - диэн санаалаах.

Тэрээһин ордук оскуола оҕото, ыччат урукку кэм ыар сылларыгар дойдубут дьоруойдуу киирситиитин, дьиҥ историтын санатар, өйдөтөр, үйэлэргэ умуннарбат суолталаах. "Кыайыы дьыктаана" 2019 сыллаахтан ыла ыытыллар. Манна Россия эрэ иһигэр буолбакка, араас дойдуларга мөлүйүөнүнэн киһи кыттар. Саха сиригэр быйыл аахсыйаҕа анаан уопсайа 864 былаһаакка арыллан үлэлээтэ, онтон 187 былаһаакката библиотека дьиэтэ. Сорудах тест быһыытынан бэриллэр, кыттааччылар 45 мүнүүтэ иһигэр ыйытыыларга хоруйдуохтаахтар.

Аина Прибылых, СӨ национальнай библиотекатын медиакиинин салайааччы: "25 ыйытыктаах тургутук быһыытынан ыытыллар. Мантан 20 ыйытыыта Ленинград блокадатыгар сыһыаннаах. Онтон биэһэ Саха сириттэн Аҕа дойду сэриитигэр кыттыылаахтарга ананар".

Национальнай библиотекаҕа үс сааланан барыта 80 киһи кыттыыны ылла. Кинилэр истэригэр, көннөрү ким баҕалаах олохтоохтор, ону тэҥэ оскуола үөрэнээччилэрэ, үөрэх кыһаларын устудьуоннара киирдилэр. Дьокуускайдааҕы медицинэ коллеһын 4 куурүһун устудьуона Сахаайа Семенова маннык хабааннаах тургутуулары көтүппэт, былырыын Кыайыы дьыктааныгар эмиэ кыттан турар.

Сахая Семёнова, Дьокуускайдааҕы медицинэ коллеһын устудьуона: "Былырыын эмиэ кыттыбытым. Ол эрэн кыра баалы ылбытым. Быйыл эмиэ бэйэбин холонон көрөөрү кытынным. Араас диктаннарга кыттабын".

"Кыайыы дьыктаанын" саамай үрдүк баалга суруйбуттар, кыайыылаахтар дипломнарынан наҕаардаланыахтара, ону тэҥэ кинилэртэн 20 бастыҥ үлэлээх кыттааччы Москваҕа Кыайыы парадыгар кыттар чиэскэ тиксиэҕэ. Оттон оскуоланы быйыл бүтэрээччилэр үрдүк баалга диктаны толорбут түгэннэригэр үрдүк үөрэххэ киирэллэригэр эбии бал аахсар кыахтаахтар.