“Илии сылааһа” иис сыаҕа кэҥиир
Иистэнэр массыыналар тыастара-уустара тохтообот. Күн өрөбүлэ суох 2022 сыл алтынньы ыйыттан "Илии сылааһа" диэн анал байыаннай дьайыыга сылдьар байыастарга көмө буолар сыаллаах иис сыаҕа тэриллибитэ. Уонна бүгүҥҥү күҥҥэ сыах ситиһиилээхтик үлэлии-хамсыы турар. Байыастар таҥастарын-саптарын хааччыйар. Айталина Рожина сыах арыллыаҕыттан ыла тиһигин быспакка үлэлии-хамсыы сылдьар.
Айталина Рожина, "Илии сылааһа" хамсааһын иистэнньэҥэ: "Алдьархай буола турдаҕына, итиччэ элбэх оҕо бара турдаҕын сатаан иистэнэр буолан баран дьиэҕэ сытыаххын баҕарбат эбиккин. Кыра да таҥаһы тигэн кэтэрдэн ыыттарбыт биһиэхэ үөрүү. Оҕолор махтаналларыттан ордук биһиэхэ туох да наадата суох".
"Илии сылааһа" сыах үлэлиирин тухары уопсайа 3 тыһ. тахса байыаһы таҥыннарда. Иистэнньэҥнэр биирдиилээн таҥаһы эрэ буолбакка, хас биирдии байыаһы "Эр хоһуун" диэн кэмпилиэгинэн хааччыйаллар. Кэмпилиэк иһигэр туох баар ис-тас таҥас арааһа барыта киирэр. Тигэр таҥас ахсаана төһө элбэх киһи анал байыаннай дьайыыга кыттарыттан тутулуктаах.
Ирина Саввина, "Илии сылааһа" иис сыаҕын салайааччыта: "Биир нэдиэлэҕэ 50-чэ оҕо барар. Ол аата биһиги оччо таҥаһы тигэбит. Бу сыахха эрэ баар буолбатахпыт, өрөспүүбүлүкэ араас муннуктарыгар үлэлии олоробут. Билигин 20-чэ филиаллаахпыт. Олор бары тигинэччи үлэлии олороллор".
Олунньу ый бүтүүтүгэр сыах үлэтигэр көмөлөһүөхтэрин баҕалаах дьон-сэргэ өҥөтүнэн быысапкалыыр массыына ылыммыттар. Маны таһынан Дьокуускай куорат 21-с № - дээх орто оскуолатыттан эмиэ эбии биир массыынаны уларсык ылбыттар. Кинилэр көмөлөрүнэн байыастарга шивроннары тигэр кыахтаннылар.
Татьяна Кривошапкина, "Илии сылааһа" хамсааһын иистэнньэҥэ: "Сакаас элбэх, кэлэ турар, киирэ турар. Оҥорон таһаарар сыах наада, ону биһиги үбүн уйунар кыахпыт суох".
Сыах үлэтэ баҕа санаа күүһүнэн үлэлээбитэ иккис сылыгар үктэннэ. Иистэнньэҥнэр бэйэлэрэ этэллэринэн бырабыытылыстыба өттүттэн улах көмө көрүллэр. Ону таһынан бэчээт тэрилтэтэ "Эр хоһуун" кэмпилиэк мөһөөччүктэрин буор-босхо таһааттаран биэрэр. Ол да буоллар өссө даҕаны эбии көмөттөн иистэнэр сыах аккаастаммат.
Ирина Саввина, "Илии сылааһа" иис сыаҕын салайааччыта: "Таҥастарбытын этикеткалыыр буоллубут. Ону эмиэ буор босхо бэчээттии олороллор. Ол курдук таҥаһынан-сабынан биир эмит улахан тэрилтэ көмөлөһөрө буоллар".
"Илии сылааһа" иистэнэр сыах арыллыаҕыттан ыла биир даҕаны күн тохтуур диэни билбэккэ үлэлии турар. Салгыы даҕаны саха байыастара анал байыаннай дьайыы ыытыллар сиригэр бара туралларын тухары тохтообокко тугу кыайалларынан, сатыылларынан күүс-көмө буолар сыаллаахтар.
