Нам улууһугар түргэнник ситэр салаа сайдар

Нератовтар дьиэ кэргэн 2018 сылтан саҕалаан көтөр иитиитинэн дьарыктаналлар. Бастаан идиэйэ киллэрээччинэн 3-с кылаас үөрэнээччитэ, уоллара Илья, буолбут. Бырайыак суруйарыгар инкубатор туһунан тыл көтөҕөн, дьоно ону тута өйөөн олоххо түргэнник киллэрэллэр. Бастаан куурусса уонна кус-хаас, онтон кэлин кэҥээн көтөр көрүҥүн инкубатордаан элбэтэн иһэллэр. Билигин хаһаайыстыбаларыгар 20 индюк уонна 40 сымыыттыыр куурусса баар.

Дарья Посельская, Ленскэй нэһилиэгин олохтооҕо: «Индюктар 28 күнүнэн тахсаллар. Инкубаторга оруобуна 28 сыталлар, онтон биһиги бэлэмнэнэн барабыт. Уйаларын сууйабыт-сотобут».

Ахсынньы, тохсунньу ыйтан бэлэмнэммитинэн бараллар. Бастакынан тартарыы тыһы куһу сакаастаан инкубатордыыллар, онтон сымыыттыыр кууруссаны, тоҕо диэтэххэ кинилэр 4-5 ыйы быһа ситэллэр. Индюк сымыытын кулун тутар саҕаланыытыгар, ол кэннэ түргэнник ситэр кустар, хаастар сымыыттарын таһаараллар. Уонна саамай бүтэһигинэн 45 күн иһигэр ситэр бройлердары угаллар. Сымыыттан тахсыбыттарын 3 күн кэннэ тута атыыга барар. 2 киилэҕэ диэри улааппыттарын кэннэ, эккэ ыытарга бэлэм буолаллар.

Андрей Нератов, Ленскэй нэһилиэгин олохтооҕо: «Индюктар сылааһы сөбүлүүллэр. Ол иһин уйаларын атахха турар гына оҥорбутум. Маны таһынан лаампанан сылытабыт, оһох оттобут. Уу кэлэн барыар диэри дьиэҕэ тураллар, онтон таһырдьа көһөртүүбүт».

Нам улууһун тыа хаһыыйыстыбатын салалтата түргэнник ситэр салаанан дьарыктанар хаһаайыстыбалары түмэн, быйылгы былааны туруорбут. Былырыын өрөспүүбүлүкэ бары муннуктарыгар тиийэ тарҕаппыттара. Онтон бу сылга улуус объемун улаатыннарар баҕа санаалааахтар.

Дарья Посельская, Ленскэй нэһилиэгин олохтооҕо: «Былырыын Нам улууһугар 3000 сайаапка киирбитэ бройлерга, онтон индюкка 500. Ону сүбэлэһэн баран, былырыыҥҥы курдук үлэлиэххэ диэммин, сымыыттары сакаастаатым. Икки дьааһык Москваттан көтөн кэллэ. Маны улууска үллэстэбит».

Атын куораттан айаннаан кэлбит сымыыттары биир күн сынньаталлар. Ол кэннэ сууйан-сотон инкубаторга угаллар. Хаһаайка  бөдөҥ улахан көрүҥү иитэрин быдан ордорор. Сайынын бу кыра сымыыттартан 26 килэҕэ тиийэ улахан индюктар тахсыахтара.

Сымыыт таҕыста эрэ түргэнник уон-уон биэс күн иһигэр, көтөн кэлэн, инкубаторга киирэ охсуохтаах. Онтон хойутаттаҕына,  тахсыыта мөлтүүр. Хаһаайыттар бэлиэтииллэринэн, сыл бастакы түөрт ыйыгар төрөөһүн бырыһыана 90% тэҥнэһэр - бу үчүгэй көрдөрүү. Онтон атын ыйдарга төрөөһүн көрдөрүүтэ быдан намтаан биэрэр.