Хаҥалас баһаарынайдара Өктөмҥө анал үөрэҕи аастылар

Суһал баһаарынай түрүлүөн, АГАТУ Өктөмнөөҕү филиалын уопсай дьиэтигэр олорор устудьуоннары таһырдьа таһаараллар. Күн бүгүн тустаах эбийиэккэ Хаҥалас улууһун баһаарынай гарнизонун тактическай үөрэхтэрэ саҕаланна. Аан бастакынан биллэн туран, манна олорооччулар сүрүн туттар малларын уонна докумуоннарын ылан таһырдьа куоттулар.

Фёдор Тимофеев, Арктическай судаарыстыбаннай агротехнологическай университет Өктөмнөөҕү филиалын административнай - хаһаайыстыбыннай салаатын салайааччыта: «23 оҕону куоттардыбыт. 3 оҕо үөрэхтэриттэн иһэллэрин кытта холбоон 26 устудьуон эвакуацияланна. Бары халлаан туругар сөп түбэһэрдик таҥнан, докумуоннарын илдьэ таҕыстылар».

Үһүйээн быһыытынан уопсай дьиэ бастакы этээһигэр, куукунаҕа ас буһарар сиртэн уот тахсыбыт. Тутатына улэһиттэр суһал баһаарынай кнопканы баттаан, устудьуоннары дьиэттэн куоттараллар. Үөрэтии барылынан аан бастакынан нэһилиэк бэйэтин баһаарынайдара Өктөмнөр кэлэллэр. Үөрэтии сүрүнэ оннук саҕаланар.

Үөрэтии барылынан баһаар улахан раангалаах буолар, онон салгыы өссө эбии чаастар кэлэллэр. Өктөмнөр кэнниттэн Нөмүгүлэр, Покровскайдар уонна Мохсоҕоллоохтор айаннатан кэлэллэр. Тутатына манна биир  барытын хонтуроллуур оперативнай ыстаап тэриллэр.

Аркадий Егоров, Покровскай куорат 1№-дээх баһаарынай чааһын салайааччыта: «Мин баһаарынай күүһү ханна ханан туралларын ыйан-кэрдэн биэрэр эбээһинэстээхпин. Уонна маны барытын докумуоҥҥа тиһэбин. Анал үөрэҕи ааһыыга 16 киһи кытта сылдьар. Ону кытта 5 массыына».

Баһаарынайдар анал туоруохтаах сирдэринэн булан, баһаары умуллараллар. Маныаха иккис этээскэ буруоттан хаххаланар аналлаах оборуудабанньалаах баһаарынайдар киирэн, көрдөөн ылан, эмсэҕэлээччини уопсайтан таһаараллар. Тутатына эмчиттэргэ туттараллар.

Оттон бу  баһаарынай-тактическай үөрэтии Хаҥалас улууһун баһаарынайдарын үлэлэрин тургутар тэрээһин буолар. Маннык улахан тэрээһин 12 сылга биирдэ буолар.

Фёдор Севостьянов, Хаҥалас улууһун баһаарынай сулууспатын салайааччыта: «2008 сыллаахха баһаарынай сулууспа диэн тэриллибитэ. Ол тэриллэригэр Хаҥалас улууһугар 12 баһаарынай чаас баар буолбуттара».

Оттон күн бүгүн профилактическай да, риэйдэбэй да үлэлэр ыытылланнар, Хаҥалас улууһугар баһаар көрдөрүүтэ намтаан турар.Сыл саҕаланыаҕыттан 13 баһаар турбут,онтон улахан аҥара техникаҕа тахсыбыт. Түмүккэ, тэрээһин урдук таһымнаахтык ааста диэн бигэргэтилиннэ.