Орхидея быыстапкатыгар атыыга кэлбэт көрүҥнэри туруордулар

Хас биирдии сибэкки бэйэ бэйэтигэр майгыннаспат ураты кэрэ көрүҥнээх. Университет Ботаническай саадыгар орхидея быыстапката  үлэлиэҕиттэн,  эриэккэс үүнээйини көрөөрү дьон тохтоло суох кэлэр. Кэлбит эрэ Саха сирин тыйыс кыһынын бэйэтин дьэрэкээн көстүүтүнэн киэргэтэр сибэккини кэрэхсиир.

Прасковья Гоголева: "Биһиги олус диэн астынныбыт, долгуйуохха диэри. Айылҕа хайдах маннык үчүчгэйи оҥорор диэн. Аны ону көрөн дьон оҥоруохтарын наада. Быыстапкалыыр хосторун наһаа үчүчгэйдик оҥорбуттар".

Орхидея саамай уһуннук сибэккилиир үүнээйилэртэн биирдэстэрэ, көрүүтэ табылыннаҕына сыл аҥаарын быһа үөрдэр. Быыстапка кэмигэр   олордууга, көрүүгэ -харайыыга ыйытыылаах дьон туһааннаах исписэлиистэртэн сүбэ ылаллар. Людмила Кралина оҕолуу бүөбэйдээн улаатыннартаабыт сибэккилэрин туһунан үөрүүнү кытта үллэстэр, кистэлэҥнэрин арыйар.

Людмила Кралина, М.К. Аммосов аатынан ХИФУ Ботаническай саадын агронома: "Дьиҥэ дьон куттанар. Көрө үөрэннэххэ олус боростуой. Нэдиэлэҕэ биирдэ уу кутуллар, ыйга биирдэ уоҕурдуллар".

Көрдөрүүгэ барыта 180 суорт үүнээйи турда. Олор истэригэр сэдэх фаленопсис, камбри уонна ванда диэн көрүҥнэр бааллар. Быыстапканы тэрийээччилэр сүрүннээн сибэкки маҕаһыыннарыгар атыыга кэлбэттэри булан дьоҥҥо - сэргэҕэ көрөдөрөллөр. Онон саҥа үүннэрээччилэргэ эрэ буолбакка бу көрүҥү үлүһүйэн туран да олордооччуларга олус интэриэһинэй уонна туһалаах. 

Сиэдэрэй быыстапканы оннооҕор хоту улуустартан тиийэ сэҥээрэн көрө кэлбиттэр. Өлөөн улууһуттан сылдьар Анджелика Николаева түгэни туһанан орхидея хас да көрүҥүн ылла. Онон сэдэх үүнээйи сотору кэминэн хоту сиргэ тыллыа.

Анджелика Николаева: "Хаһан да көрбөтөх үүнээйилэрбин көрөн олус диэн үөрдүм. Хата сибэкки бөҕө атыыластым. Онтубун Өлөөҥҥө илдьэ барабын".

Орхидея быыстапката быйыл иккис төгүлүн турда. Тэрийээччилэр сыаналыылларынан, сылдьааччы ахсаана биллэ эбиллибит. Онон мантан ыла аны өссө дэҥҥэ көстөр орхидеялары тас дойдулартан киллэриигэ үлэлэһиэхтэрэ. Бу сырыыга дьон сэҥээриитин кыра кээмэйдээхтэр ордук ыллылар. Маннык көрүҥ орхидеяны таптаан олордооччуларга сэдэх уонна үгүстүк сырсан туран булар көрүҥнэрэ.   

Людмила Кралина, М.К. Аммосов аатынан ХИФУ Ботаническай саадын агронома: "Кыра орхидеялар оҥоруу түмүгэр тахсыбыттар. Онон уратылар. Сыаналара ол иһин хаһан баҕар үрдүк буолар". 

Дьэрэкээн сибэккилэр быыстапкалара бу ый 20 күнүгэр диэри  Ботаническай саадка туруоҕа, онтон өрөбүл күн Национальнай библиотекаҕа орхидеялары көһөртүөхтэрэ.