Хатаһынан сырыы уһаата

Үлэһиттэр массыына сырыытын тохтотор анал бэлиэлэрин хостоон, туруохтаах сиригэр айанныыллар. Суол үлэһиттэрэ муус туругун, массыына айанныыр сирин чинчийэн көрөн баран дьэ суолу сабарга быһаарыныы ыллылар. Дьокуускай - Аллараа Бэстээх хайысханан муус устар 15 күнүттэн ыла массыына сырыыта бобулунна.

Дьокуускай-Аллараа Бэстээх хайысханан муус суола сабылынна. Аны мантан ыла массыына сырыыта тохтоото. Анал бэлиэни астылар. Аны сотору кэминэн шлагбаум туруоруохтара.

Бүтэһик массыыналар утуу-субуу ыксаабыттыы суолу туоруу охсоорулар тэтимнээх айаны туталлар. Аны паром сырыыта олохтонуор диэри киһи массыынан сылдьар кыаҕа суох буолан бүтэһиктээх малларын, таһаҕастарын тиэйэ охсоору тиэтэйэллэр. Суоппардар этэллэринэн суол туруга мөлтөөбүт, ол эрэн айанныыр кыах баар диэн үллэстэллэр.

Лазарь Васильев, суоппар: «Суол оҥоруута былырыыҥҥыттан мөлтөх. Ол эрэн сылдьыахха сөп. Биллэн турар, уу бөҕө киирбит». 

Билиҥҥи туругунан кыһыҥҥы суолга муус халыҥа 1 миэтэрэҕэ тэҥнэһэр. Ол эрэн муус тутула алдьанан, кэбирээн, уу тахсан массыына айанныырыгар, дьон олоҕор-дьаһаҕар кэккэ кутталы үөскэтэр диэн түмүккэ суол үлэһиттэрэ кэллилэр. Төһө да муус халыҥын иһин айанньыттарга сэрэхтээх.

Гаврил Фёдоров, "Бүлүү" федеральнай суол салалтатын суолу туһаныыга салаатын солбуйааччы: «Муус үрдүнэн уу киирэ турар. Уута дириҥээн иһэр. Мууска уонна икки өттүгэр тахсыыга суол туруга мөлтөөбүтүнэн сырыыны тохтоторго быһаарыныы ыллыбыт». 

Даркылаах суолун кытары Кангалаас - Суотту хайысханан эмиэ суол сабылынна. Билиҥҥи туругунан Өлүөнэ өрүһү Хатаһынан туоруохха сөп. Анал хамыыһыйа быһаарыытынан ити суолунан муус устар 17 күнэ бүтүөр диэри айанныахха сөп. 18 чыыһылатыттан Өлүөнэ өрүскэ биир да суол үлэлээбэт буолар. Мууска тахсыы бобуллар, анал рейдэлэр олохтоноллор.

Татьяна Степанова, ЫБММ Саха Сиринээҕи салалтатын нэһилиэнньэ уу эбийиэктиэригэр куттала суох буолуутун хааччыйар салаа салайааччытын солбуйааччы: «Уопсайа 23 муус суолугар айан тохтоото. Ол иһигэр 6 федеральнай, 3 өрөспүүбүлүкэ уонна 14 муниципальнай суолталаах. Оттон хаалбыт муус суолларыгар бу ый 25 күнүттэн сырыы тохтуура былааннанар ». 

Дьокуускай - Аллараа Бэстээх хайысханан суол сырыыта былырыын эмиэ муус устар 15 күнүгэр сабыллыбыт. Аны сотору кэминэн салгын олбохтоох ааллар сырыылара олохтонуо. Онон дьон-сэргэ ыксаллаах кыһалҕатынан эрэ айанныырга күһэллиэ.