Александр Игнатьев кэриэһигэр спартакиада спорт бастыҥнарын быһаарда

Өрөспүүбүлүкэ спордун сайдыытыгар улахан кылаатын уурбут Александр Игнатьев сырдык кэриэһигэр аналлаах спартакиада 4-с төгүлүн ыытылынна. Манна Нам улууһун бары кэриэтэ нэһилиэктэрэ кыттыыны ыллылар. Уопсай кыттааччы ахсаана быйыл 1000 киһиэхэ тэҥнэстэ. Кини аатын сүгэр стадиоҥҥа чугас дьоно мустан, сибэкки дьөрбөтүн уурдулар.

Юрий Дьяконов, Нам улууһун баһылыгын социальнай сайдыыга солбуйааччыта: "Ыччаттарбытыгар кини олоҕун-дьаһаҕын сырдатаарыбыт улууспут биир улахан күрэхтэһиитин кини аатынан ыыта сылдьабыт. Инникитин даҕаны Александра Афанасий аатын ааттатаммыт бу күрэхпит үүнэн-сайдан иһиэҕэ. ".

Семён Ядрихинскай, Нам улууһун култууратын салалтатын салайааччыта: "Биһиги бырабыыталыстыбабыт, баһылыкпыт сорудаҕынан стадион Александр афанасьевич аатынан ааттаммыта. Ол иһигэр биһиги сквер оҥороммут кинини хас сыл ахсын Наммыт улууһун сүүмэрдэммит хамаандата улахан күрэхтэһиилэргэ мантан барабыт".

Күрэхтэһиигэ буулдьанан уонна оҕунан ытыы, саахымат, гиирэ, эр дьоҥҥо, дьахталларга волейбол көрүҥнэрэ киирдилэр. Саамай тыҥааһыннаах киирсиинэн, биллэр турар, хаһыылаах-ыһыылаах волейбол күрэҕэ буолла.

Нам улууһа өрөспүүбүлүкэҕэ бу көрүҥҥэ бастыҥынан биллэр. Онон нэһилиэктэр икки ардыларпыгар тыҥааһыннаах оонньуу буолла. Хатырык нэһилиэгэр саҥа спорт киинэ тутуллан, дьарыктанарга бары усулуобуйа барыта баар буолбута. Ол иһин быйыл күүстээх дьарык түмүгүнэн Хатырык нэһилиэгэ волейболга бастыыр иһин тахсан үөрүүтэ үгүс.

Айсен Парников, Хатырык нэһилиэгин олохтооҕо: "Саҥа саалалаах буоламмыт күн аайы толору. Кэрэ аҥаардарбыт эмиэ сылдьар буоллулар. Волейбол, футбол нэдиэлэҕэ үстүүтэ буолар".

Гиирэни анньыы бу спартакиадаҕа быйылгыттан бастакытын ыытыллар. Манна кыттааччылар ким төһөнү кыайарынан уон мүнүүтэҕэ анньан көрдөрүөхтээхтэр.

16, 24 уонна 32 киилэлээх гиирэлэри өрө анньаллар. Арассыыйа спордун маастара Иннокентий Окоемов быйыл бэтэрээннэргэ эрэ кыттыыны ылар. Урут бэтэрээннэргэ да, эр дьоҥҥо да иккиэннэригэр тэҥнээҕин булбат этэ. Билигин быраабыла уларыйан бэйэтин саастаахтарын кытта күөн көрүстэ.

Иннокентий Окоёмов, Хамаҕатта нэһилиэгин олохтооҕо: "Мин дьарыктаммытын сүүрбэттэн тахса сыл буолла. Гиирэҕэ сахалартан маҥнайгы маастарбын. “Урожай” уопсастыба күрэҕэр Россияҕа 5-6 бастаабытым. Быйыл уон тохсус сылбын өрөспүүбүлүкэни кыайдым".

Быйыл Нам улууһугар Оҕо спордун сыла биллэриллибитэ. Ол чэрчитинэн сылын аайы ыытыллар "Спортивные Якутяне" бүтэһик түмүктүүр түһүмэҕэ Нам улууһугар ыытыллыаҕа. Бу күрэхтэһии бастакытын тыа сиригэр ыытыыллар, онон Нам улууһугар бу сонун уонна устуоруйаҕа киирэр түгэн буолар.