Оскуолаларга олохтоох аһы элбэтиэхтэрэ

Чуораан тыаһа лыҥкынаата. Оҕолорго минньигэс, иҥэмтиэлээх ас кэмэ.  Остолобуой эмискэ туола түстэ. Бу переменаҕа алын сүһүөх кылаас оҕолорун аһыыр кэмнэрэ. Бүгүн эбиэккэ оскуола асчыттара харчо, компот уонна килиэп бэлэмнээбиттэр. Кылаас салайааччылара астарын иһиттэргэ куппуттарын кэннэ оҕолор  аһыыллар. Үөрэнээччилэр этэллэринэн астара олус минньигэс.

Аһыыр ас минньигэс эрэ буолбакка туһалаах уонна иҥэмтиэлээх буолуохтаах. Онон оскуола асчыттара бэйэлэрин оҕолоругар курдук араас ас эгэлгэтин буһараллар. Астара сүрүннээн ууга оргуйар эбэтэр итии паарга буһар. Арыылаах-сыалаах ас суох буолан хас да бүк туһалаах.

Алексей Лаврентьев идэтинэн повар. 2-с сылын оҕолорго ас астыыр. Былырыын оҕо уһуйааныгар үлэлээн баран, быйыл оскуолаҕа көспүт. Талбыт идэтин олус сөбүлүүр. Кини аһын оҕолор эмиэ бэркэ астыналлар. Быйыл   "Оскуола  остолобуойун бастыҥ повара" диэн үрдүк аакка тиксэн үөрүүтэ үгүс.

Алексей Лаврентьев, Дьокуускай куорат 39№ - дээх орто оскуола асчыта: “О5олорго кыһаллан туран минньигэстик астыыбыт уонна саамай сүрүнэ доруобуйаҕа туһалаах гына. Оҕолор биэстэ аһыыллар. Сарсыарда өттүгэр хааһы, оттон эбиэккэ миин эбэтэр торуой”.

2020 сылтын саҕалаан сыл ахсын бүтүн Россиятааҕы "Лучшая школьная столовая" диэн күрэх ыытыллар. Муус устар 10 күнүгэр өрөспүүбүлүкэ иһинээҕи түһүмэҕэ түмүктэннэ. Салгыы дойду таһымнаах күрэххэ тыа сирин оскуолаларыттан Майа оскуолата уонна куорат оскуолаларыттан Ньурба орто оскуолата барар чиэскэ тигистилэр. Тэрээһин  аан дойдутааҕы доруобуйа күнүгэр ананна.

Ульяна Лебедева, Доруобуйа харыстабылын министиэристибэтин диетология салаатын сүрүн исписэлииһэ: “Оскуола, уһуйаан оҕолорун аһа үчүгэй буолуохтаах диэн үлэлэспиппит олус ыраатта. Өрөспүүбүлүкэ иһигэр ыытыллар үлэни сэргэ Арассыыйа улахан исписэлиистэрин, тэрилтэлэри кытта үлэлэһэ сылдьабыт”.

Оскуолаларга ас-үөл чааһа бу курдук улахан болҕомтоҕо турар. Регион бырабыытылыстыбата сүҥкэн үлэни ыытар. Маныаха кэнники сылларга олохтоох бэйэ бородууктатынан, сибиэһэй аһынан оскуола остолобуойдарын хааччыйыы туһунан элбэх кэпсэтии барар. Хамсааһын баар. Өссө да бу үлэ кэҥиэхтээх диэн  Ил Дархан сыал-сорук туруорбута.