Тулагы-Киллэм оҕо уһуйааныгар төрүт тылга үөрэтэллэр

"Сардаана" бөлөх сардаана сибэккилии сандаарыйан оҕо уһуйаанын ырыанан толорор. Тулагы-Киллэм нэһилиэгин Сыырдааҕын Айылгы оҕо саадыгар Дьиэ-кэргэн уонна Оҕо сылларын чэрчилэринэн үгүс үлэ ыытыллан саҕаламмыт. Онтон биирдэстэрэ - оҕолору уонна төрөппүттэри кытары ыкса үлэ.

Анисия Игнатьева, "Айылгы" оҕо уһуйаанын иитээччитэ: «Владимир Владимирович Путин Дьиэ кэргэн сылын бигэргэппитэ, Ил Дархаммыт Оҕо сылынан бэлиэтээтэ. Иннэ гынан биһи оҕолорбутун сахалыы саҥарарга иитэбит. Араас күрэхтэргэ, сэминардарга уонна дьиэ кэргэни кытта ааҕыыларга кыттабыт. Төрөппүттэр дьиэ кэргэнинэн түмсэллэр».

Айылыгы оҕо уһуйаана быйыл аан бастакы төгүрүк даататын, саҥа эбийиэккэ киирбитэ 5 сылын көрсөр. Оттон оҕо уьуйааныгар күн бүгүн 300-кэ кэриҥэ оҕо сылдьар. Кырачаан дьон эргиччи сайдалларыгар манна усулуобуйа барыта тэриллибит. Сып-сылаас, киэҥ-куоҥ, аныгы ирдэбилгэ толору эппиэтиир уһуйааҥҥа театральнай, ырыа,  спортивнай саалалар. Оҕолор да, үлэһиттэр да дьарыктаналларыгар анал оборуудабанньалар бааллар.

Саргылана Ушницкая, "Айылгы" оҕо уһуйаанын сэбиэдиссэйэ: «Быйыл уһуйааммыт 5 сыллаах үбүлүөйэ. 281 оҕо сылдьар. Тулагы-Киллэмтэн, Мархаттан, Саталтан. 16 бөлөхтөөхпүт, олортон алтата сахалыы хайысхалаах. 41 педагог үлэлиир, онтон 30 уһуйааччылар. Биһиэхэ хас биирдии оҕо сайдарыгар, талаанын арыйарыгар, кыаҕын туһанарыгар усулуобуйа барыта баар».

Дьиэ-кэргэн уонна оҕо сылын чэрчитинэн буолаары турар тэрээһиҥҥэ кыттыыны ылыахтаах "Кустук" бөлөх эмиэ бэлэмнэнии үөһүгэр сылдьар. Кырачаан дьон номнуо сахалыы музыкальнай үнүстүрүмүөннэринэн ох курдук тутталлар. Өбүгэ тыыныгар кырачааннары 5 сылын иитээччинэн үлэлиир Сахаайа Попова уһуйар.

Сахаайа Попова, "Айылгы" оҕо уһуйаанын иитээччитэ: «Дьиэ кэргэн, Оҕо сылыгар анаан тэрээһин буолаары турар. Онно бэлэмнэнэ сылдьабыт. Төрүт ырыаларбытын ыллыыбыт».

Уһуйаан былаана киэҥ. Билигин олохтоох көҕүлээһиннэри өйүүр бырагыраамаҕа киирсэн, өссө эбии ИТ хайысхаҕа хос арыйары былаанныыр үлэ барар.