Медицинскэй тэрилтэлэр эрэгийиэннэр икки ардыларынааҕы быыстапка турда

Өймөкөөн улууһуттан төрүттээх билигин киин куорат олохтооҕо Светлана Ядреева доруобуйаҕа анаммыт быыстапка-дьаарбаҥка буоларын истээт, кэлэн исписэлиистэргэ көрдөрө санаммыт. Улахан уочараты ааспакка быраастан тута консультация ылар бэрт табыгастаах диэн этэр. 

Светлана Ядреева, Дьокуускай олохтооҕо: «Кардиологка көрдөрөөрү кэлбитим, ону кардиолог суох эбит ол иһин терапевтка сырыттым. Барытын кэрийэн көрдүбүт уонна бу атахпын массажтата олоробун».

Медицинскэй тэрилтэлэр, балыыһалар эрэгийиэннээҕи сыллата ыытыллар быыстапкаларыгар уонунан араас тэрилтэ кытынна. Манна доруобуйаны бөҕөргөтүүгэ, ыарыылары эмтэһиҥҥэ туһуламмыт табаар, бородууксуйа өҥө оҥорооччулар муһуннулар. Ону тэҥэ нэһилиэнньэҕэ анаан быраастар тустаах консультация биэрдиллэр. 

Сардаана Андреева, "Фтизиатрия" научнай-практическай киин оҕо сэллигин эмтиир балыыһатын бырааһа: «Нэһилиэнньэ кэлэн короновирус кэннэ ыалдьан пневмониялаабыттарын кэннэ КТ барбыттарын ону сүбэ көрдөөтүлэр. Биһи тутатына “Архимед” бырагыраамаҕа киирэммит кинилэр КТ снимоктарын көрөммүт кэккэ сүбэлэри биэртэлээтибит».

Фтизиатрия научнай-практическай Киин бырастара сыллата улахан дьон ФЛГ, оҕолор манту, диаскин тест туттарыллара булгуччулааҕын санаталлар. Маны тэҥҥэ манна СПИД-Киинтэн кэлэн ВИЧ, оттон да атын куттааллаах инфекционай ыарыыларга босхо түргэнник оҥоһуллар экспресс-анализ туталлар.

Кирилл Терентьев, "СПИД-Центр" тэрилтэҕэ волонтёр-медик: «Туберкулез, гепатит В, С, сифилис уонна ВИЧ, СПИД курдук ыарыылары быһаарабыт. Бастакы күммүтүгэр 36 киһи туттарда».

Кэлбит дьон психиатр, нарколог, невролог, офтальмолог, дерматолог быраастарга көрдөрөн сүбэ ылар кыахтанна.

Наталья Иванова, СӨ 3№-дээх клиническэй балыыһатын психолога: «Биһиги “Кабинет памяти” иһинэн үлэлиибит, кабинеппытыгар икки исписэлиис баар – невролог уонна клиничэскэй психолог. Невролог киһи умнуган буолбут буоллаҕына, өйдүүрүгэр ыарырҕатар буоллаҕына кини эмп көмөтүнэн эмтиир мин эбии дьарыгынан, когнитивнай эрчийиилэри ыытабын».

Саха сирин медициснкэй тэрилтэлэрин тэҥэ, атын эрэгийиэннэр бэрэстэбиитэллэрэ эмиэ бэйэлэрин өҥөлөрүн, табаардарын, араас тэриллэрин билиһиннэрэллэр. Кэриэй, Кытай медицинэлэрин бэрэстэбиитэллэрэ эмиэ кытталлар.

Мичийэ Хомдьоо, Кытай медицинскэй тэрилтэтин бэрэстэбиитэлэ: «Бу Кытай бородууксуйалара хас биирдии киһи бу олоххо чэгиэнник уһуннук олордун диэн».

Быыстапка-дьарбаҥка бу бээтинсэҕэ диэри Куруһаала атыы-эргиэн эрээттэригэр үлэлиэҕэ.