Горнай улууһугар булчуттар күрэхтэрэ ыытылынна

Быйыл Горнайга 28 төгүлүн ыытыллыбыт булчут күрэҕэ улуус бары 9 нэһилиэгиттэн 8-тыы киһилээх 12 хамаанданы Бэрдьигэстээх Маатта эбэ хотуунугар түмтэ,   төһө да сааскы сытыы тыаллаах күн турдар, сорсуннаах булчуттар көрүҥ аайы эгил-тэгил түсүһэн кииристилэр, маҥнайгы көрүҥунэн Калашников автоматын бириэмэҕэ ыһыы-хомуйуу буолла манна “Байанай” хамаандаттан Василий Данилов 23.25 сөкүүндэнэн түмүктүү охсон кыайыылаах таҕыста

Эр дьон ортотугар үгүс мөккүөрү таһаарбыт көрүҥүнэн ойбон алларыыта буолла, манна эрдэ хаара ыраастаммыт мууска үстүү паара тэҥинэн киирэн халыҥ мууһу көйөн анал шаблон батар ойбонун оҥордулар, маҥнайгынан киирбиттэргэ син судургу буоллаҕына, ойбон уута халыйбытын кэннэ киирбиттэргэ  мууһу көйуу ыарахаттары үөскэттэ.  Ону ол диэбэккэ 1996 сылтан булчут курэҕэ хара тэриллиэҕиттэн биир да сылы көтүппэккэ кыттар Кировскай нэһилиэгин “Байанай” хамаандатыттан 56  саастаах Василий Дьячковскай доҕорун кытары 1 мүнүүтэ 44 сөкүүндэнэн тумуктээтилэр.

Василий Дьячковскай, Кировскай нэһилиэгин "Байанай " хамаандатын кыттыылааҕа: «Анньыым боростуой. Арааһы боруобалаабытым, билигин чурапчылар анньыыларын илдьэ сылдьабын. Билигин анньыылар бары үчүгэйдэр. Наһаа ыксыыллар уонна кыараҕас гыналлар».

Кэлэр  түһүмэх уот оттон, чэй өрүү буолла,  хахсаат тыалга күөл кырыытыгар аһаҕас сиргэ аҥардас испиискэнэн эрэ уот отто охсуу уустук буолла, сорохтор тарбахтара бөҕүөрүөр диэри кэлэ-кэлэ саба үрэ турар тыалга испиискэни чыыппаан маска даҕайа сатаан сылайдылар, ол эрэн утуу субуу хамаандалар унаар буруолара күөдьүйэн, күлүһүн уотун сыралаҕаныттан мэктиэтигэр халлаан сылыйбыкка дылы буолла. Бу түһүмэххэ бастакынан Кировскай “байанайдара” ууну оргуттулар.  уопсай түмүккэ эстафета, ытыы көрүҥнэрин очукуолара эбиллэн үһүс миэстэҕэ “Үрдэл” хамаандата, иккис миэстэҕэ “Тигр” хамаандата оттон бастакы миэстэҕэ “Бизон” хамаандата тахсан “Учур” булт маҕаһыыныттан сертификаттары туттулар. Бу үс иһигэр киирбит хамаандалар үһүөн Бэрдьигэстээх нэһилиэгин хамаандалара.

Никон Дьяконов, Булчут күрэҕин сүрүн судьуйата: «Быйыл комплекснай спартакиадаҕа киирбитин быһыытынан нэһилиэктэр бары кэлэн кытыннылар. Ол түмүгэ туспа таҕыста: бастакы миэстэни Солоҕон хамаандата ылла, иккис – Бэрдьигэстээх хамаандата, үһүс – Ойуун Ууһа Октябрьскай нэһилиэгин хамаандата».

Булчут күрэхтэһиитин улууска тэрийсэн саҕаласпыт, Өрөспүүбүлүкэ “Байанай” күрэҕин хас да төгүллээх кыайыылааҕа Руслан Пахомов сырдык аатын үйэтитэн кини төрөппүттэрэ, аймах дьоно 4 сылын олохтообут 50 тыһ. солк анал харчынан бириистэрин күрэхтэһиигэ ситиһиилээхтик кыттыбыт “Тигр” хамаандаттан Николай Семенов уонна “Көтөт” хамаандаттан Афанасий Алексеев ыллылар.

Оттон кыайыылаах “Бизон” хамаандата салгыы улуус чиэһин Өрөспүүбүлүкэҕэ көмүскүү бараары тэристэр.