Дьокуускайга дрону көтүтүүгэ күрэх саҕаланна

Ыраах Сунтаар Кутанатыттан кэлэ сылдьар Бэргэн хамаанда, бүгүҥҥү сэрэбиэйинэн 5-нэн күрэхтэһэр буоллуллар. Кутана орто оскуолатын үөрэнээччитэ Антон Третьяков төһө да долгуйдарбыт кыайыыга эрэллээхпит диэн санаатын үллэстэр.

Антон Третьяков, кыттааччы: «Бу кыһын саҕаланыытыттан эрчиллэн саҕалаабыппыт. Миэстэлэһэр санаалаах сылдьабыт. Дрон ыытарга ыарахан, элбэх күүһү сэниэни ылар. Хас күн аайы эрчиллэр буоллахына үчүгэйдик ыытар буолаҕын».

Владислав Третьяков,  Кутана орто оскуолатын информатикаҕа учуутала: «Маннык күрэх биһи Өрөспүүбүлүкэбитигэр буоларын истэн бараммыт биһи тута сайаапка биэрбиппит. Бэйэм уруккуттан дронунан дьарыктанарбын сөбүлүүбүн. Билигин спортивнай дроннарга бэйэбитин холонон көрөөрүбүт кэллибит».

Социалистическай үлэ дьоруойа Петр Иванович Дудкин аатын сугэр Дьокуускайдааҕы сибээс коллеһыгар Арассыыйа таһымыгар сүүмэрдиир Өрөспүүбүлүкэтээҕи дрону көтүтэр оскуола оҕолоругар уонна устудьуоннарга анаммыт күрэх үөрүүлээх быһыыга-майгыга арылынна.

Василий Местников, күрэҕи тэрийээччи: «Хамаанда иһигэр икки пилоттаахтар, техник-инженер уонна салайааччы. Пилоттар үстэ көтөллөр. Көмпүүтэргэ симуляторга күрэхтэһэллэр, дьиҥнээххэ майгынныр, анал трассалар бааллар».

Күрэх 2 бөлөҕүнэн хайдан ыытыллар. Кыралар уонна улахаттар. Хас биирди хамаанда 4 киһиттэн турар: икки оператор, биир инженер-техник уонна биир уһуйааччы. Бастаан кыттааччылар симуляторынан дроннары көтүтэллэр, салгыы инженердар ыйытыыларга хоруйдуулар. Онтон уопсай түмүк оҥоһуллан кыайылаахтар биллиэхтэрэ.

Маныаха күн бүгүн дойду үрдүнэн уопсастыбынай хамсааһын "Бастыкылар хамсааһыннара" уонна  Саха сирин ДОСААФ тэрилтэтэ патриотическай иитиигэ сөбүлэҥ түһэристилэр. Маны сэргэ биллэн туран, кыттааччылары анал байыаннай дьайыыга бэринилээхтик Ийэ дойдуларын иннигэр ытык иэстэрин толоро сылдьар буойуттарбыт кэлэн алгыс тылларын, сүбэлэрин-амаларын эттилэр тыынныллар. Уонна аннараатах байыаннай дьайыы сиригэр дроннар оруоллара улаханын тоһоҕолоон, чопчулаан биэрдилэр.

Михаил Копырин, "БАРС-2" этэрээт разведкалыыр салаатын хамандыыра: «Бүгүҥҥү кыттар оҕолорго баҕарыам этэ сатабылларын эйэлээх олоххо туһаналларыгар. Оҕолор бэйэлэрэ дрон оҥостоллор эбит, үөрэнэн сайдыҥ, олохутугар туруорбут сыалгытын ситиһиҥ».

Курэх икки күн устата ыытыллар. Кыайыылаахтар бэс ыйыгар Москваҕа тиийэн Өрөспүүбүлүкэ чиэһин көмүскүү барыахтара.