Аграрнай үөрэх кыһаларын бүтэрээччилэргэ анаммыт үлэ дьаарбаҥката

Арктикатааҕы агротехнологическай университет устудьуона Виолетта Васильева ветсанэксперт идэтин баһылаан үөрэҕин быйыл бүтэриэхтээх. Оскуола саҕаттан баҕаран киирбит идэтигэр ситиһиилээхтик үөрэнэн салгыы үлэ көрдүүр түбүгэ үүннэ.

Виолетта Васильева, Арктикатааҕы агротехнологическай университет устудьуона: «Практикаланар сирдэрбиттэн ыйытааччыбын. Бу сайын Роспотребнадзога сылдьыбытым, кинилэргэ миэстэ баар этэ. Бу сылга бүтэрдэхпинэ онно барыам».

Быйыл АГАТУну 700 кэриҥэ устудьуон бүтэрэр. Выпускниктар аҥардара кэриҥэ үлэ миэстэтин көрдүү, биитэр номнуо булан, кэпсэтэн олороллор.

Эдэр идэлээхтэр - агропромышленнай комплекс инникитэ. Арктикатааҕы агротехнологическай университетка быйыл бүтэрээччилэргэ анаммыт үлэ миэстэтин дьаарбаҥката буолла. Өрөспүүбүлүкэ сири кытта үлэҕэ сулууспатыгар хас даҕаны исписэлиискэ наадыйаллар.

Валентина Винокурова, сири кытта үлэҕэ сулууспа салайааччытын солбуйааччы: «Агрохимикка наадыйабыт, сайыны быһа командировкаҕа сылдьар оҕо наада. Химик, агрохимик үөрэхтээх киһини лабараторияҕа наадыйабыт. Биһиэхэ саҥа салаа тэриллиэхтээх, онно землеустроитель, суоппар наада буолар».

Тэрээһиҥҥэ үөрэхтэрин быйыл бүтэрээччилэр эрэ буолбакка, алын куурус устудьуоннара эмиэ кытыннылар. Уус Алдан улууһуттан төрүттээх Виталий Васильев ойуур хаһаайыстыбатын үлэһитэ буолуохтаах, салгыы магистратураҕа киирэр соруктаах.

Виталий Васильев, Арктикатааҕы агротехнологическай университет устудьуона: «Мин 3 кууруска үөрэнэ сылдьабын, идэбинэн лесничэй буолаары сылдьабын. Билигин магистратураҕа киириэхпин баҕарабын. Ону бүтэрэн үлэлии киирбит үчүгэй буолуо этэ».

Үлэ дьаарбаҥката тыа хаһаайыстыбатын кэпэрэтииптэрин аан бастакы сийиэһин чэрчитинэн ыытылынна. Дьаарбаҥкаҕа 13 тэрилтэ - үлэ биэрээччи кытынна. Тыа хаһаайыстыбатын тэрилтэлэрэ уопсайа 40 миэстэ туруордулар. Олортон биирдэстэринэн Чурапчы тыа хаһаайыстыбатын оҥорон таһаарар кэпэрэтиибэ буолла. Тэрилтэҕэ бүгүҥҥү күҥҥэ 130-тан тахса үлэһит баар, эбии технолог, бухгалтер, экономист наада.

Мария Лебедева, "Чурапчы" ТХПК үлэһитэ: «Үлэлии кэлэр оҕолору үчүгэйдик көрсөбүт. Дьиэннэн уотунан хааччыйыыбыт суох эрээри, кинилэргэ дьиэ буларга, арендаларын төлөһөргө көмөлөһөбүт. Орто хамнастара билиҥҥи туругунан 48-50 тыһ. иһинэн, ол таһынан билигин МРОТ улаата турар, онон өссө көрөн иһиэхтээхпит».

Бүгүҥҥү күҥҥэ тыа хаһаайыстыбатын салаатыгар идэлээхтэри тиийбэттэр. Бу сүрүннээн технологтар, ветеринардар, зоотоехниктар, агроинженердар.

Маныаха тыа хаһаайыстыбатын министиэристибэтэ эдэр идэлээхтэри өйүүр сыллаах ыйдааҕы көмө төлөбүрдэри киллэрбитэ. Ол курдук тыа хаһаайыстабтын тэрилтэтигэр үлэлии киирбит выпускник 3 сыл тухары ый аайы пособие аахсар кыахтанар. Ааспыт сылга маннык социальнай төлөбүрү 200-тэн кэриҥэ выпускник туһаммыта. Быйыл даҕаны бу хайысха салҕанан барыаҕа.