Хаҥалас улууһун Мохсоҕоллооҕор спортивнай киин аһылынна

Мохсоҕоллоох бөһүөлэгин олохтоохторугар бэлиэ күн үүннэ. Нэһилиэккэ аан бастакытын спортивнай-сынньанар киин аһыллар үөрүүлээх түгэнэ. Кыһыл лиэнтэни бөһүөлэк баһылыга Александр Пермяков, улуус баһылыгын солбуйааччы Юрий Никифоров уонна Якутцемент тэрилтэ салайааччыта, меценат Алиш Мамедов быстылар.

Эргэ алын сүһүөх оскуолатын дьиэтин Якутцемент тэрилтэ өрөмүөннээн, спортивнай тэрил атыылаһан кылгас кэм иһигэр 500-тэн тахса кв.м. иэннээх дьиэ спордунан дьарыктанарга, дьон-сэргэ кэлэн сынньанарыгар бэлэм буолла. Ол курдук манна гимнастика секцията, саахымат-дуобат, бильярд кулууптара, остуол тенниһын куруһуоктара үлэлиэхтэрэ. Саргылаана Федорова оскуолаҕа физкультура учуутала, ону тэҥэ оҕолору, улахан дьону остуол тенниһыгар дьарыктыыр.

Саргылаана Фёдорова: физкультура учуутала, остуол тенниһыгар тренер: «Дьарыктаммыттара 3 сыл буолла. Ааспыт нэдиэлэҕэ улуус күрэхтэһиитигэр миэстэлэспиттэрэ, алта мэтээли илдьэ кэлбиттэрэ. Оскуолаҕа дьарыктанар этибит, наар 3 этээскэ остуол саҕарытыахха наада этэ. Билигин саҥа спортзалга анал остуоллар бааллар, ол иһин олус үөрдүбүт».

Мохсоҕоллооххо тыһыынчанан киһи олорор, бөдөҥ нэһилиэк.  Мантан инньэ оҕолор эрэ буолбакка, улахан дьон, ыччат, ким баҕалаах кэлэн бильярд, теннис кэлэн оонньуон сөп. Онон нэһилиэнньэ иллэҥ кэмин туһалаахтык атаарарыгар толору кыах үөскээтэ.

Юрий Никифоров, "Хаҥалас улууһа" МТ баһылыгын солбуйааччы: «Мохсоҕоллоох нэһилиэнньэтигэр спортунан уонна физкультуранан дьарыктанарга усулуобуйа оҥоһуллан эрэриттэн киһи үөрэр».

Кииҥҥэ маны тэҥэ общественнай тэрилтэлэргэ, чуолаан дьахтар сэбиэтэ уонна Иһирэх түмсүү туспа хостоннулар. Людмила Дьячковская 1985 сылтан Мохсоҕоллооххо олорор. Үйэтин тухары медсиэстэрэнэн үлэлэбитэ, билигин бочуоттаах сынньалаҥар олорор. Людмила Ивановна Иһирэх дьахталлар түмсүүлэригэр дьарыктанар. саҥа хостонон айар үлэбит өссө сайдыа диэн эрэллээх.

Людмила Дьячковская, Мохсоҕоллоох бөһүөлэгин олохтооҕо: «Бириэмэ буллубут да түмсэбит. Билигин таҥаспытын саппытын тиктэ сылдьабыт. Саха сирин маастардарыгар кыттыбыппыт. Тойуктуубут, чабырҕахтыыбыт, оһуохайдыыбыт уонна хомустуубут. Сотору Казань куоракка куонкуруска кыттаары сылдьабыт».

Олохтоохтор саҥа кииннэннэн сүргэлэрэ көтөҕүллэн сылдьар. Саҥа кыайыылар, ситиһиилэр өсө да кэлиэхтэрэ турдаҕа.