Жатайдааҕы техникумҥа Абилимпикс уонна Профессионалитет күрэх ыытылла турар

Жатайдааҕы техникум мастарскыайыгар күннэтэ тыаһыыр тимири уһаарар тыас тохтоло суох иһиллэр. Ол эрэн бу сырыыга үөрэх чааһа буолбакка "Профессионалитет" регионнааҕы түһүмэҕэр устудьуоннар күрэхтэһэ сылдьаллар. 6 чаас устата сорудахтарын толорон, үлэлэрин экспертар дьүүллэригэр таһаарыахтаахтар.

Александр Афанасьев, күрэхтэһии сүрүн сыаналааччыта: «Билигин кыттааччыларым бастакы муодул оҥоро сылдьаллар. Аллараа тоһоҕолору оҥороллор, ол кэннэ сурааһын тардан баран тоһоҕолорун ууруохтаахтар. Сорудахтарыгар 6 чаас бэриллэр».

Ыарахан үлэттэн чаҕыйбакка тимири кытары үлэҕэ оннооҕор кыргыттар ылсаллар. Ону ааһан уолаттары кытары тэҥинэн күрэххэ киирсэллэр.

Онтон бу манна минньигэс ас сыта дыргыйан турар. Абилимпикс бүтүн Арассыыйатааҕы чөмпүйэнээт регионнааҕы түһүмэҕэр кыттааччылар илиҥ-кэлиҥ түсүһэллэр. Икки бүлүүдэни астаан дьүүллүүр сүбэ сыанабылын ылыахтара. Күрэх бара да турар кэмигэр экспертар илии-атах хамсаныытын, үлэлиир миэстэ туругун кэтииллэр.

Ас астааччылар бары технологияны туһанан, бэйэлэрин көрүүлэрин эбэн, авторскай истииллээх кына астыыллар. Манна кинилэр сатабыллара уонна ураты көрүүлэрэ сыаналанар.

Күрэххэ анаан Жатайдааҕы техникум анал волонтердары бэлэмниир. Кинилэр ыалдьыттары көрсүүгэ, күрэх ыытылларыгар улахан өҥөлөөхтөр, итиэннэ доруобуйаларынан хааччаахтаах дьоҥҥо төһүү күүс буолаллар.

Любовь Винокурова, Жатайдааҕы техникум методиһа: «Быйыл үлэбитин көрдөрөммүт сөбүлэһии түһэристибит. Бу үлэ чэрчитинэн Абилимпикс Өрөспүүбүлүкэ үрдүнэн ыытылларыгар көмөлөһөөччүлэри бэлэмнииргэ үөрэх ыытабыт уонна бу оҕолору доруобуйалара хааччахтаах дьоннору кытта хайдах алтыһарга, кэпсэтэргэ, арыаллыырга үөрэтэммит чемпионат үлэтигэр устудьуоннар үлэлии сылдьаллар».

Абилимпикс уонна Профессионалитет күрэхтэһиилэр устудьуоннар, эдэр исписэлиистэр, доруобуйаларынан хааччахтаах дьон бэйэлэрин сатабылларын, кыахтарын, дьоҕурдарын тургуталларыгар эбии уопут ылынналларыгар ананар.

Владимир Тихонов, Жатайдааҕы техникум дириэктэрэ: «Ый бүтүөр дылы биһиги бу үс хайысханы ыытан бүтэриэхтээхпит. 10 хамаанда толору кытта сылдьар. Түмүктэрин көрүөхпүт уонна ситиһиилээх оҕолор Арассыыйа финалыгар киирэллэригэр биһиги сүрдээҕин кыһаллабыт уонна ситиһиилэри баҕарабыт».

Регионнааҕы этапка бастаабыт дьон, хамаандалар аны Арассыыйатааҕы күрэххэ тиийэн Сахабыт сирин чиэһин көмүскүөхтэрэ. Бэйэлэрин идэлэрин таһымын үрдэтэн, маастарстыбаларын чочуйан кыайыыга дьулуһуохтара.